ИТСВ: «Ўзбекистон Президентига йўлланаётган мурожаатларнинг 40 фоизи кредит масаласи билан боғлиқ»

Президент Шавкат Мирзиёевнинг тадбиркорлар билан очиқ мулоқотидан аввал ишбилармонларнинг ташаббус ва муаммоларини ўрганиш мақсадида 2021 йилнинг 20 июль куни ташкил этилган Республика штаби ҳамда call-марказларига шу пайтгача кредит масаласи билан боғлиқ 5 мингдан зиёд мурожаат келиб тушган. Бу ҳақда Инвестициялар ва ташқи савдо вазирлигининг бош мутахассиси Дадахон Жуманиёзов «Дарё» мухбири Миролим Исажоновга берган интервьюсида таъкидлаб ўтди.

«20 июлдан 3 августгача йўлланган жами 10 минг 623 та мурожаатдан деярли 40 фоизи кредит масаласи билан боғлиқ. Мурожаатлар мазмуни шундайки, фуқаролар кредитга ҳужжат топширган, аммо банкдан қарз чиқиши кечикяпти, кредит олиш билан боғлиқ ҳужжатларда камчиликлар бор, деб қайтариб юборилмоқда. Асосан, мана шу каби мурожаатлар йўлланяпти.

Шунингдек, банкдан кредит олиб, пандемия даврида қийин аҳволга тушиб қолган ишбилармонлар кредит муддатини узайтириш масаласида ёрдам сўрамоқда. Бундай муаммоси бор тадбиркорларнинг кредит муддатини узайтиришга ёки уларнинг айланма маблағига қўшимча кредит ажратиб, уларни ҳар томонлама қўллаб-қувватлашга тижорат банклари томонидан ҳаракат қилиняпти.

Шуни алоҳида қайд этиш керакки, штабга барча тижорат банк вакиллари жалб этилган. Улар банк фаолиятига тааллуқли ҳар бир мурожаатни индивидуал тарзда ўрганиб, қонун доирасида ижобий ечим топишда кўмаклашишмоқда», — деди Жуманиёзов.

Унинг таъкидлашича, ўн тўрт кун давомида бизнесни молиялаштириш, кредитлаш ва субсидиялаш бўйича 5 мингдан ортиқ мурожаат келиб тушган. Шундан 2 мингга яқини ҳал этилган. Ҳудудлар кесимида мурожаатлар кўплиги бўйича Сурхондарё (589 та), Қашқадарё (470 та), Самарқанд (440 та) вилоятлари етакчилик қилмоқда.