АҚШ асосий ҳарбий кемалар ва амфибия-десант кучларидан фойдаланган ҳолда, LSE 2021 (Large Scale Exercise 2021) глобал миқёсли уюшган денгиз машғулотларини бошлади. Бу ҳақда АҚШ ҳарбий-денгиз кучларига таяниб «Интерфакс» хабар берди.
АҚШ ҳарбийларининг маълумотларига кўра, 16 августгача давом этадиган LSE 2021 машғулотлари «душман кучларига қарши курашиш бўйича глобал сценарийга асосланган».
Қайд этилишича, LSE 2021 АҚШ ҳарбий-денгиз кучларининг совуқ уруш давридан буён ўтказган энг йирик машғулотларидир. Бундай миқёсдаги машқлар охирги марта 1981 йилда ўтказилган. Шу билан бирга, ҳозирги машғулотлар айнан ўша пайтдаги каби «стратегик рақобат шароитида НАТОнинг қатъиятлилиги ва АҚШнинг имкониятларини намойиш этиши» кераклиги таъкидланмоқда.
АҚШ ҳарбий-денгиз кучларида қайд этилишича, машғулотлар душманларга Америка флотининг бир вақтнинг ўзида бир нечта уруш саҳналарида мувофиқлаштирилган операциялар ўтказиш имкониятларини кўрсатиши керак.
Уюшган машғулотларга 36 га яқин ҳарбий кемалар, шу жумладан, самолёт ташувчилар, ракета крейсерлари, эсминецлар, зарба берувчи сувости кемалари ва йирик ҳужум кемалари, шунингдек, кемалар ва денгиз авиацияси, бешта операцион флот ва учта денгиз пиёдалари экспедицион дивизиясидан ташкил топган бўлинмалар жалб қилинган. Машғулотларда жами 25 мингдан зиёд ҳарбий хизматчи қатнашмоқда.
АҚШ ҳарбий-денгиз кучларининг глобал машқлари бир вақтнинг ўзида 17 та вақт зонасида бўлиб ўтади.
Америка ҳарбий нашрларида қайд этилишича, Америка денгиз гуруҳлари ва амфибия-десант қўшинларининг сўнгги 40 йилдаги энг йирик глобал уюшган машғулотлари АҚШнинг Россия ва Хитойга ҳар қандай агрессияга бир вақтнинг ўзида бир неча жабҳаларда, жумладан, Қора денгиз, Шарқий Ўрта Ер денгизи, Жанубий Хитой ва Шарқий Хитой денгизларида жавоб бериши мумкинлигини кўрсатиши лозим.
Изоҳ (0)