Turkiya hukumati mamlakat janubidagi yong‘inlar yuzasidan bir kishini hibsga oldi. Bu haqda prezident Rajab Toyyib Erdo‘g‘on Marmarisdagi matbuot anjumanida ma’lum qildi, deb yozadi “RBK”.
“Milasdagi yong‘inga aloqador bir kishi qo‘lga olindi. Oldin aytib o‘tganimdek, terrorchilik tashkiloti yetakchilari o‘rmonlarni yoqish haqida ko‘rsatma berganidan keyin mamlakatda o‘rmon yong‘inlari maydoni ikki marta kengaydi. Hozirgi yong‘inlardan ba’zilari ana shu buyruqlar bo‘yicha sodir etilganini istisno qilmaymiz. Bizning vazifamiz — bizning o‘rmonlarimiz va o‘pkalarimizni yoqib yuborganlarni topish”, — dedi davlat rahbari.
Avvalroq Erdo‘g‘on yong‘inlar yuzasidan tergov olib borishda o‘t qo‘yish versiyasi istisno qilinmayotganini aytgandi. “Biz yong‘inlar sabablarini diqqat bilan tekshiramiz. Agar o‘z vataniga o‘t qo‘yishga qodir shunday xoinlar bo‘lsa, ular eng shafqatsiz jazoga loyiq bo‘ladi”, — degandi u.
Shuningdek, Turkiya hududlarida o‘rmon yong‘inlari oqibatida yetgan zararni bartaraf qilish bo‘yicha shoshilinch choralarga dastlabki bosqichda 50 million turk lirasi (taxminan 6 million dollar) ajratildi.
“Jabrlangan har bir kishi davlatdan yordam oladi. Zarar to‘liq hajmda qoplab beriladi, soliqlar to‘lash to‘xtatib turiladi. Bir yil davomida falokat hududida yonib ketgan barcha turar joy inshootlari qaytadan quriladi”, — dedi Erdo‘g‘on.
Prezident 31-iyul, shanba kuni kechki paytga kelib, o‘rmon yong‘inlarining aksariyat o‘choqlarining tarqalishi to‘xtatilib, o‘chirilganini ma’lum qildi. Yong‘inlarni o‘chirishda Turkiyaga Rossiya, Ukraina, Eron va Ozarbayjon yordam berdi.
Turkiya janubidagi o‘rmon yong‘inlari 28-iyulda boshlandi. Dastlab ular Antaliya atrofidagi hududlarni qamrab olgan bo‘lsa, keyinroq Bodrum va Marmaris kabi boshqa kurort hududlarga ham tarqala boshladi. Shu sababli hukumat jabr ko‘rgan viloyatlarni falokat hududi deb e’lon qildi.
Yong‘inlar oqibatida o‘nlab odamlar jabrlandi, qishloq xo‘jalik maydonlari, fermalar yo‘q qilindi, chorva mollari nobud bo‘ldi. Yong‘in xavfi ostida qolgan turar joy hududlaridan aholi evakuatsiya qilindi. Favqulodda vaziyat tufayli Turkiya janubida sayyohlik tadbirlari, ekskursiyalar butunlay to‘xtatildi.
Izoh (0)