Toshkentdagi to‘rtta obyektda 3,7 mlrd so‘mlik ta’mirlash va qurilish ishlari tender g‘oliblari aniqlanmasdan olib borilgan

Korrupsiyaga qarshi kurashish agentligi axborot xizmati rahbari Durdona Ochilova 30-iyul, juma kuni AOKAda o‘tkazilgan brifingda davlat xaridlarining amalga oshirilishi bo‘yicha qator qonun buzilishlari haqida ma’lumot berdi.

Uning aytishicha, budjet buyurtmachilari tomonidan obyektlarni joriy ta’mirlash bo‘yicha “dxarid.uz” maxsus axborot portaliga joylashtirilgan e’lonlar joylarga chiqib o‘rganilganda, Toshkent shahridagi 4 ta obyektda 3,7 milliard so‘mlik, shundan 2,8 milliard so‘mlik Obodonlashtirish boshqarmasi, 611 million so‘mlik oliy ta’lim, 200 million so‘mlik xalq ta’limi tizimida joriy ta’mirlash va qurilish ishlari tanlov g‘oliblari aniqlanmasdan boshlab yuborilgani yoki allaqachon tamomlangani aniqlangan.

Shunday holatlar O‘zbekistonning boshqa hududlarida ham qayd etilgan.

Xususan, Jizzax viloyatidagi tanlov e’loni tamomlanmagan 7 ta obyekt joyiga chiqib o‘rganilganida, xalq ta’limidagi 4 ta obyektda 2,2 milliard so‘mlik qurilish va joriy ta’mirlash ishlari tanlov g‘oliblari aniqlanmasdan turib yakunlangani, sog‘liqni saqlash sohasidagi 2 ta obyektda 1,1 milliard so‘mlik, shahar hokimligining 1 ta obyektida 386 million so‘mlik qurilish ishlari boshlanib, yakunlanish arafasida ekanli ma’lum bo‘lgan. Masalan, Jizzax shahar 1-sonli maktab binosining isitish tizimida 2020-yilda bajarib bo‘lingan ish uchun davlat budjeti hisobidan yangidan 815 million so‘mlik lot qo‘yilgani aniqlangan.

Agentlik xodimlari tomonidan o‘rganishlar doirasida Buxoro viloyatida ta’lim tizimidagi muassasalarda olib borilayotgan joriy ta’mirlash ishlari o‘rganilganda, xalq ta’limi tizimidagi 3 ta obyektda 304 million so‘mlik, maktabgacha ta’lim tizimidagi 1 ta obyektda 28 million so‘mlik, jami 4 ta obyektda 332 million so‘mlik qurilish va joriy ta’mirlash ishlari tanlov g‘oliblari aniqlanmasdan turib yakunlangani yoki ta’mirlash ishlari olib borilayotgani aniqlangan.

Shuningdek, Buxoro viloyati oliy ta’lim tizimidagi 5 ta obyektda jami 20,0 milliard so‘mlik qurilish-ta’mirlash bilan bog‘liq tender savdolarini o‘tkazish jarayonida “Davlat xaridlari to‘g‘risida”gi qonun talablari buzilganligi ma’lum bo‘lgan.

O‘rganishlar davomida Namangan viloyati xalq ta’limi tizimidagi 15 ta obyekt ko‘zdan kechirilganida, 3,3 milliard so‘mlik, sog‘liqni saqlash tizimidagi 7 ta obyektda 850 million so‘mlik ta’mirlash ishlari bo‘yicha tanlov e’lon qilingan bo‘lsa-da, tanlov g‘oliblari aniqlanmasdan turib, ta’mirlash ishlari yakunlanganligi yoki davom etayotganligi ma’lum bo‘ldi.

Andijon viloyatidagi tender tanlovlari tugallanmagan 39 ta obyekt joyiga chiqib o‘rganilganida, xalq ta’limi tizimiga qarashli 21 ta obyektda 6 milliard so‘mlik, hududiy hokimlikka tegishli 11 ta obyektda 4,5 milliard so‘mlik, maktabgacha ta’limi tizimidagi 6 ta obyektda 1,8 milliard so‘mlik, sog‘liqni saqlash tizimidagi 4 ta obyektda 1 milliard so‘mlik, oliy ta’lim tizimidagi 3 ta obyektda 700 million so‘mlik qurilish ishlari boshlanib, yakunlanish arafasida ekanligi ma’lum bo‘ldi.

Masalan, Shahrixon tumanidagi obodonlashtirish bo‘limi binosini joriy ta’mirlash yuzasidan qiymati 1,1 milliard so‘mlik e’lon berilgan va hujjatlarni taqdim qilishning oxirgi muddati 2021-yil 16-iyul qilib belgilangan. Ammo o‘rganish jarayonida bo‘lim binosini joriy ta’mirlash uchun hech qanday ehtiyoj mavjud emasligi aniqlangan.

Farg‘ona viloyatida o‘tkazilgan o‘rganishlar doirasida Farg‘ona shahridagi o‘rmon xo‘jaligi binosini mukammal ta’mirlash bo‘yicha maxsus axborot portalida joylashtirilgan qiymati 421 million so‘mlik tanlov e’loni tanlov g‘olibi aniqlanmasdan turib, binoda mukammal ta’mirlash ishlari amalga oshirib kelinayotgani ma’lum bo‘lgan.

Qoraqalpog‘iston Respublikasida Xalq ta’limi vazirligi tizimidagi 76 ta umumta’lim maktabida jami 47,8 milliard so‘mlik, Sog‘liqni saqlash vazirligi tizimida 14 ta tashkilotda jami 7,9 milliard so‘mlik, Maktabgacha ta’lim vazirligi tizimida 16 ta tashkilotda jami 7,9 milliard so‘mlik, jami 63,6 milliard so‘mlik smeta xarajatlarida mablag‘ rejalashtirilmagan bo‘lsa-da, amalda bo‘lgan “Davlat xaridlari to‘g‘risida”gi qonunga zid ravishda “dxarid.uz” maxsus axborot portaliga e’lonlar joylashtirilgani aniqlangan.

Monitoring yakunlari bo‘yicha budjet buyurtmachilari tomonidan qonunchilikka zid ravishda 141 milliard so‘mlik 458 ta davlat xaridlarining amalga oshirilishi bo‘yicha e’lon qilingan tanlovni bekor qilish haqida vazirlik va idoralarga 372 ta taqdimnoma kiritish yo‘li bilan qonunbuzilishlarning oldi olinishi ta’minlangan.

111 ta obyektda esa 29,5 milliard so‘mlik qurilish va joriy ta’mirlash ishlari bo‘yicha e’lon qilingan tanlovlar yuzasidan g‘oliblar aniqlanmasdan turib, qonunchilik talablariga zid ravishda qurilish va joriy ta’mirlash ishlari boshlab yuborilganligi yoki yakunlangani ma’lum bo‘lgan.

Korrupsiyaga qarshi kurashish agentligi axborot xizmati rahbarining bildirishicha, hozirda o‘rganishlarda aniqlangan qonunbuzilish holatlari bo‘yicha to‘plangan hujjatlar mansabdor shaxslarning xatti-harakatlariga qonuniy baho berish maqsadida prokuratura organlariga yuborish choralari ko‘rilmoqda.