Toshkentda haydovchini tegishli belgi qo‘yilmagan yo‘lda qoida buzganlikda ayblagan YPX xodimiga xizmat tekshiruvi tayinlandi

Ijtimoiy tarmoqda “GAI: qoida buzdingiz, lekin belgi yo‘q” sarlavhasi ostida tarqalgan video yuzasidan ma’lumot berildi.

Qayd etilishicha, 2021-yilning 27-iyul kuni Toshkent shahar, Yunusobod tumani, Saylgoh ko‘chasida YPX xodimi M.Shirinov tomonidan Spark rusumli avtomobil haydovchisi to‘xtatilgan.

O‘zaro muloqot vaqtida YPX xodimi haydovchining talabiga ko‘ra dislokatsiya ko‘chirmasini taqdim qilmagan.

Shuningdek, YPX xodimi haydovchiga qarama-qarshi harakatlanib kelganini aytganda, haydovchi yo‘lda tegishli belgilar o‘rnatilmagani sabab to‘g‘ri harakatlanganligini ta’kidlagan.

Hozirda mazkur holat yuzasidan Toshkent shahar IIBB YHXB tomonidan xizmat tekshiruvi o‘tkazilmoqda.

Bundan avval Surxondaryoda profilaktika inspektorining yordamchilari IIBga olib ketilayotgan fuqaroni urib, o‘ldirib qo‘ygani, “Samarqand darvoza” ko‘ngilochar savdo markazida IIB xodimi va fuqaro o‘rtasida tortishuv yuzasidan ma’lumot berilgani hamda Angrenda kuniga 50 ta bayonnoma yozishi aytilgan YPX xodimiga nisbatan xizmat tekshiruvi o‘tkazilgani haqida xabar berilgandi.