Тошкентдаги тўртта объектда 3,7 млрд сўмлик таъмирлаш ва қурилиш ишлари тендер ғолиблари аниқланмасдан олиб борилган

Коррупцияга қарши курашиш агентлиги ахборот хизмати раҳбари Дурдона Очилова 30 июль, жума куни АОКАда ўтказилган брифингда давлат харидларининг амалга оширилиши бўйича қатор қонун бузилишлари ҳақида маълумот берди.

Унинг айтишича, бюджет буюртмачилари томонидан объектларни жорий таъмирлаш бўйича «dxarid.uz» махсус ахборот порталига жойлаштирилган эълонлар жойларга чиқиб ўрганилганда, Тошкент шаҳридаги 4 та объектда 3,7 миллиард сўмлик, шундан 2,8 миллиард сўмлик Ободонлаштириш бошқармаси, 611 миллион сўмлик олий таълим, 200 миллион сўмлик халқ таълими тизимида жорий таъмирлаш ва қурилиш ишлари танлов ғолиблари аниқланмасдан бошлаб юборилгани ёки аллақачон тамомлангани аниқланган.

Шундай ҳолатлар Ўзбекистоннинг бошқа ҳудудларида ҳам қайд этилган.

Хусусан, Жиззах вилоятидаги танлов эълони тамомланмаган 7 та объект жойига чиқиб ўрганилганида, халқ таълимидаги 4 та объектда 2,2 миллиард сўмлик қурилиш ва жорий таъмирлаш ишлари танлов ғолиблари аниқланмасдан туриб якунлангани, соғлиқни сақлаш соҳасидаги 2 та объектда 1,1 миллиард сўмлик, шаҳар ҳокимлигининг 1 та объектида 386 миллион сўмлик қурилиш ишлари бошланиб, якунланиш арафасида эканли маълум бўлган. Масалан, Жиззах шаҳар 1-сонли мактаб биносининг иситиш тизимида 2020 йилда бажариб бўлинган иш учун давлат бюджети ҳисобидан янгидан 815 миллион сўмлик лот қўйилгани аниқланган.

Агентлик ходимлари томонидан ўрганишлар доирасида Бухоро вилоятида таълим тизимидаги муассасаларда олиб борилаётган жорий таъмирлаш ишлари ўрганилганда, халқ таълими тизимидаги 3 та объектда 304 миллион сўмлик, мактабгача таълим тизимидаги 1 та объектда 28 миллион сўмлик, жами 4 та объектда 332 миллион сўмлик қурилиш ва жорий таъмирлаш ишлари танлов ғолиблари аниқланмасдан туриб якунлангани ёки таъмирлаш ишлари олиб борилаётгани аниқланган.

Шунингдек, Бухоро вилояти олий таълим тизимидаги 5 та объектда жами 20,0 миллиард сўмлик қурилиш-таъмирлаш билан боғлиқ тендер савдоларини ўтказиш жараёнида «Давлат харидлари тўғрисида»ги қонун талаблари бузилганлиги маълум бўлган.

Ўрганишлар давомида Наманган вилояти халқ таълими тизимидаги 15 та объект кўздан кечирилганида, 3,3 миллиард сўмлик, соғлиқни сақлаш тизимидаги 7 та объектда 850 миллион сўмлик таъмирлаш ишлари бўйича танлов эълон қилинган бўлса-да, танлов ғолиблари аниқланмасдан туриб, таъмирлаш ишлари якунланганлиги ёки давом этаётганлиги маълум бўлди.

Андижон вилоятидаги тендер танловлари тугалланмаган 39 та объект жойига чиқиб ўрганилганида, халқ таълими тизимига қарашли 21 та объектда 6 миллиард сўмлик, ҳудудий ҳокимликка тегишли 11 та объектда 4,5 миллиард сўмлик, мактабгача таълими тизимидаги 6 та объектда 1,8 миллиард сўмлик, соғлиқни сақлаш тизимидаги 4 та объектда 1 миллиард сўмлик, олий таълим тизимидаги 3 та объектда 700 миллион сўмлик қурилиш ишлари бошланиб, якунланиш арафасида эканлиги маълум бўлди.

Масалан, Шаҳрихон туманидаги ободонлаштириш бўлими биносини жорий таъмирлаш юзасидан қиймати 1,1 миллиард сўмлик эълон берилган ва ҳужжатларни тақдим қилишнинг охирги муддати 2021 йил 16 июль қилиб белгиланган. Аммо ўрганиш жараёнида бўлим биносини жорий таъмирлаш учун ҳеч қандай эҳтиёж мавжуд эмаслиги аниқланган.

Фарғона вилоятида ўтказилган ўрганишлар доирасида Фарғона шаҳридаги ўрмон хўжалиги биносини мукаммал таъмирлаш бўйича махсус ахборот порталида жойлаштирилган қиймати 421 миллион сўмлик танлов эълони танлов ғолиби аниқланмасдан туриб, бинода мукаммал таъмирлаш ишлари амалга ошириб келинаётгани маълум бўлган.

Қорақалпоғистон Республикасида Халқ таълими вазирлиги тизимидаги 76 та умумтаълим мактабида жами 47,8 миллиард сўмлик, Соғлиқни сақлаш вазирлиги тизимида 14 та ташкилотда жами 7,9 миллиард сўмлик, Мактабгача таълим вазирлиги тизимида 16 та ташкилотда жами 7,9 миллиард сўмлик, жами 63,6 миллиард сўмлик смета харажатларида маблағ режалаштирилмаган бўлса-да, амалда бўлган «Давлат харидлари тўғрисида»ги қонунга зид равишда «dxarid.uz» махсус ахборот порталига эълонлар жойлаштирилгани аниқланган.

Мониторинг якунлари бўйича бюджет буюртмачилари томонидан қонунчиликка зид равишда 141 миллиард сўмлик 458 та давлат харидларининг амалга оширилиши бўйича эълон қилинган танловни бекор қилиш ҳақида вазирлик ва идораларга 372 та тақдимнома киритиш йўли билан қонунбузилишларнинг олди олиниши таъминланган.

111 та объектда эса 29,5 миллиард сўмлик қурилиш ва жорий таъмирлаш ишлари бўйича эълон қилинган танловлар юзасидан ғолиблар аниқланмасдан туриб, қонунчилик талабларига зид равишда қурилиш ва жорий таъмирлаш ишлари бошлаб юборилганлиги ёки якунлангани маълум бўлган.

Коррупцияга қарши курашиш агентлиги ахборот хизмати раҳбарининг билдиришича, ҳозирда ўрганишларда аниқланган қонунбузилиш ҳолатлари бўйича тўпланган ҳужжатлар мансабдор шахсларнинг хатти-ҳаракатларига қонуний баҳо бериш мақсадида прокуратура органларига юбориш чоралари кўрилмоқда.