So‘nggi haftalarda poytaxt aholisi orasida COVID-19 infeksiyasi va pnevmoniyaga chalinish holatlari soni keskin ortishi natijasida Toshkent shahar tez tibbiy yordam stansiyasi brigadalari tig‘iz sharoitda faoliyat yuritmoqda, deb xabar beradi SSV matbuot xizmati.
Respublika Shoshilinch tibbiy yordam ilmiy markazi Toshkent shahar tez tibbiy yordam stansiyasi bosh shifokori Doniyor Bo‘riboyevning so‘zlariga ko‘ra, 2021-yilning qariyb 7 oyi davomida shahar 103 xizmatiga koronavirusga gumon qilingan, pnevmoniya va COVID-19 kasalligi tasdiqlangan hamda boshqa yuqumli xastaliklar bilan jami 22 mingdan ziyod chaqiruv kelib tushgan. Jumladan, iyul oyining 28-sanasiga qadar tez yordam xizmatiga murojaat qilgan 12 ming 38 nafar katta yoshli va 895 nafar 18 yoshgacha bo‘lgan ana shunday bemorlarga sifatli tez tibbiy yordam ko‘rsatilgan.
Ma’lum qilinishicha, ayni paytda shahar 103 xizmati Call-markaziga bir kunda o‘rtacha 4700 nafar fuqaro murojaat qilmoqda. Jumladan, so‘nggi 10 kun ichida (19-iyuldan – 28-iyulgacha) 46 ming 569 ta chaqiriq kelib tushgan bo‘lsa, shundan pnevmoniya belgilari kuzatilgan, koronavirus tashxisi qo‘yilgan va boshqa yuqumli kasalliklar bilan 12 ming 933 nafar bemorga sifatli tez tibbiy yordam ko‘rsatilgan.
“Afsuski, hozirda ba’zi fuqarolar istimasi salgina ko‘tarilsa yoki boshi biroz og‘irib qolsa darrov vahimaga tushib, tez yordamga murojaat qilmoqda. Vaholanki, haroratning ko‘tarilishi faqat koronavirus infeksiyasi yoki pnevmoniyaning simptomigina emas. Qolaversa, odamning istimasi 37—37,5 yoki 38 darajaga chiqishi bilan darrov ahvoli og‘irlashib qolmaydi. Shu bois, xalqimiz buni to‘g‘ri tushunishi, agar shunday bo‘lgan taqdirda, eng avvalo, oilaviy shifokorga murojaat qilishi va uning tavsiyalariga rioya etishi zarur”, — deyiladi xabarda.
Shuningdek, chaqiriqlarga o‘z vaqtida javob berish, ularni tez tibbiy yordam brigadalariga tezkor ravishda uzatish hamda tarmoqda biron bir bandlik holatlari kuzatilmasligi uchun shahar 103 xizmati Call-markazi operatorlari soni qo‘shimcha 40 nafarga oshirilib, jami 80 nafarga yetkazilgan.
Avvalroq O‘zbekistonda tashkil qilingan koronavirus bo‘yicha Call-markazlarga kunlik murojaatlar soni bir oyda 5 marotabaga oshgani, Zangiotadagi shifoxonalarga ichimlik suvi yetishmayotgani sabab volontyorlar xayriya aksiyasiga qo‘l urgani to‘g‘risida xabar berilgandi.
Izoh (0)