Сўнгги ҳафталарда пойтахт аҳолиси орасида COVID-19 инфекцияси ва пневмонияга чалиниш ҳолатлари сони кескин ортиши натижасида Тошкент шаҳар тез тиббий ёрдам станцияси бригадалари тиғиз шароитда фаолият юритмоқда, деб хабар беради ССВ матбуот хизмати.
Республика Шошилинч тиббий ёрдам илмий маркази Тошкент шаҳар тез тиббий ёрдам станцияси бош шифокори Дониёр Бўрибоевнинг сўзларига кўра, 2021 йилнинг қарийб 7 ойи давомида шаҳар 103 хизматига коронавирусга гумон қилинган, пневмония ва COVID-19 касаллиги тасдиқланган ҳамда бошқа юқумли хасталиклар билан жами 22 мингдан зиёд чақирув келиб тушган. Жумладан, июль ойининг 28-санасига қадар тез ёрдам хизматига мурожаат қилган 12 минг 38 нафар катта ёшли ва 895 нафар 18 ёшгача бўлган ана шундай беморларга сифатли тез тиббий ёрдам кўрсатилган.
Маълум қилинишича, айни пайтда шаҳар 103 хизмати Call-марказига бир кунда ўртача 4700 нафар фуқаро мурожаат қилмоқда. Жумладан, сўнгги 10 кун ичида (19 июлдан – 28 июлгача) 46 минг 569 та чақириқ келиб тушган бўлса, шундан пневмония белгилари кузатилган, коронавирус ташхиси қўйилган ва бошқа юқумли касалликлар билан 12 минг 933 нафар беморга сифатли тез тиббий ёрдам кўрсатилган.
«Афсуски, ҳозирда баъзи фуқаролар истимаси салгина кўтарилса ёки боши бироз оғириб қолса дарров ваҳимага тушиб, тез ёрдамга мурожаат қилмоқда. Ваҳоланки, ҳароратнинг кўтарилиши фақат коронавирус инфекцияси ёки пневмониянинг симптомигина эмас. Қолаверса, одамнинг истимаси 37—37,5 ёки 38 даражага чиқиши билан дарров аҳволи оғирлашиб қолмайди. Шу боис, халқимиз буни тўғри тушуниши, агар шундай бўлган тақдирда, энг аввало, оилавий шифокорга мурожаат қилиши ва унинг тавсияларига риоя этиши зарур», — дейилади хабарда.
Шунингдек, чақириқларга ўз вақтида жавоб бериш, уларни тез тиббий ёрдам бригадаларига тезкор равишда узатиш ҳамда тармоқда бирон бир бандлик ҳолатлари кузатилмаслиги учун шаҳар 103 хизмати Call-маркази операторлари сони қўшимча 40 нафарга оширилиб, жами 80 нафарга етказилган.
Аввалроқ Ўзбекистонда ташкил қилинган коронавирус бўйича Call-марказларга кунлик мурожаатлар сони бир ойда 5 маротабага ошгани, Зангиотадаги шифохоналарга ичимлик суви етишмаётгани сабаб волонтёрлар хайрия акциясига қўл ургани тўғрисида хабар берилганди.
Изоҳ (0)