“Biznes bilan bevosita muloqot — ishlabilarmonlik muhitini yaxshilashning eng samarali vositasi” mavzusida 30-iyul, juma kuni o‘tkazilgan matbuot anjumanida biznes-ombudsman va bosh vazir qabulxonasi rasmiylari 2021-yilning o‘tgan davrida tadbirkorlar murojaati asosida, qancha mas’ul shaxsga chora ko‘rilgani to‘g‘risida so‘z yuritdi. Bu haqda “Daryo” muxbiri xabar bermoqda.
“Bilasizlar, biz faqat tadbirkorlar va davlat o‘rtasida munosabatdamiz, davlat organlariga nisbatan chora ko‘ramiz. Bizga kelib tushgan murojaatlarning har birini, albatta, individual tarzda o‘rganib chiqamiz.
Joriy yilning o‘tgan davrida 1 ming 312 ta ta’sir chora qo‘llaganmiz. 900 nafarga yaqin davlat organi xodimini ma’muriy javobgarlikka tortganmiz. Ularning ichida hokim o‘rinbosarlari ham, rahbarlar ham bor. Shu bilan birga, 225 nafar mansabdor shaxsni intizomiy javobgarlikka tortib, 467 ta davlat organlari qarorlarini noqonuniy deb topganmiz. Sudlarga tadbirkorlar manfaati yo‘lida 19 milliard so‘mlik da’vo arizalari kiritganmiz”, — dedi biznes-ombudsman direktori Dilmurod Qosimov.
O‘zbekiston bosh vazirining tadbirkorlar murojaatlarini ko‘rib chiqish qabulxonalari faoliyatini tashkil etish va muvofiqlashtirish kotibiyati mudiri Abudamalik Allamurodovning qayd etishicha, joriy yilning olti oyida 547 nafar mas’ullarga nisbatan tegishli choralar ko‘rilgan.
“Prezidentning 2019-yil 14-maydagi farmoni bilan har bir hududda bosh vazir qabulxonalari tashkil etilgan. Birgina joriy yilning olti oyida 40 ming 636 ta murojaat kelib tushgan. Mazkur murojaatlarning 23 ming 715 tasi yoki 59,6 foizi shahar, tuman miqyosida, 13 ming 206 tasi viloyat darajasida, 2 ming 857 tasi Respublika darajasida ko‘rib chiqilgan.
Bosh vazir qabulxonalari orqali shu yilning birinchi yarmida 547 nafar mas’ulga nisbatan tegishli chora-tadbir ko‘rildi. Jumladan, mahalliy davlat hokimiyati organlarining 105 nafar, bank muassasalarining 325 nafar, tashkilot va idoralarning 117 nafariga choralar ko‘rilgan. Shundan, 359 nafariga hayfsan berilgan, 106 nafariga jarima intizomiy chorasi qo‘llanilgan, 64 nafari lavozimidan ozod etilgan, 18 nafar mas’ul mansabdor shaxs ma’muriy javobgarlikka tortilgan”, — dedi Allamurodov.
Mavzuga doir:
- O‘zbekiston Prezidentiga eng ko‘p qaysi hudud tadbirkorlari murojaat qilayotgani va ko‘proq qanday masalalar yo‘llanayotgani ma’lum bo‘ldi
- “Toshkent shahar kengashining qarorida reklama konstruksiyalarini demontaj qilish bo‘yicha talab yoki topshiriqlar belgilanmagan” — biznes-ombudsman
- Toshkentdagi reklama bannerlarini buzish bo‘yicha qaror huquqiy ekspertizadan o‘tkazilmagan — biznes-ombudsman
Izoh (0)