Andijon viloyati Bo‘ston (sobiq Bo‘z) tumani hokimi Sadbarxon Mamitova 31-iyul kuni og‘ir xastalikdan vafot etdi, deya xabar bermoqda “Daryo” muxbiri Umidjon Mamarasulov.
“Daryo” muxbirining qayd etishicha, Sadbarxon Mamitova iyun oyidan buyon Respublika shoshilinch tibbiy yordam ilmiy markazi Andijon filialida ichak kasalligi bo‘yicha davolanayotgan edi. Ma’lumotlarga ko‘ra, Sadbarxon Mamitova 2013—2015-yillar oralig‘ida o‘t pufagida mavjud xastalik bois jarrohlik muolajasini olgan.
“O‘t pufagini lazer nuri orqali olish jarayonida nur ichak tizimlariga shikast yetkazgan va yillar davomida chirish holatiga olib kelgan. Iyun oyida kasallik belgilari kuchayishi oqibatida u yana jarrohlik stoliga yotqizilgan edi”, — deydi Mamitova xonimning “Daryo” muxbiri bilan suhbatlashgan yaqinlaridan biri.
Ma’lumot uchun, Sadbarxon Mamitova 1966-yilda Andijonning Jalaquduq tumanida tug‘ilgan, 1982—1986-yillarda Namangan qishloq xo‘jaligi texnikumida o‘qigan, 1993-yil Toshkent davlat agrar universitetini (sirtqi) tamomlagan. U uzoq yillar Jalaquduq tumanida turli lavozimlarda mehnat qilgan.
Xususan, 2007—2008-yillarda tuman hokimi o‘rinbosari — tuman xotin-qizlar qo‘mitasi raisi bo‘lgan, 2011—2017-yillarda Jalaquduq tumani Bandlikka ko‘maklashish markazi direktori lavozimlarida ishlagan. 2019-yildan “Yuksalish” umummilliy harakati Andijon viloyati hududiy bo‘limiga rahbarlik qilgan.
U 2020-yilning 4-martidan buyon Bo‘ston tumani hokimi vazifasida ishlab kelayotgan edi. Ma’lum qilishlaricha, Sadbarxon Mamitovaning janoza marosimi 31-iyul, shanba kuni soat 16:00 da Jalaquduq tumanida bo‘lib o‘tadi.
Eslatib o‘tamiz, 2020-yil 29-sentabrida Andijon viloyati Xonobod shahri hokimi Musaxon Mamadaliyev o‘tkir yurak qon-tomir yetishmovchiligi kasalligidan, 7-oktabr kuni viloyatning Oltinko‘l tumani hokimi Nazirjon O‘rinboyev pnevmoniya kasalligi asoratlari va o‘tkir yurak qon-tomir yetishmovchiligidan vafot etgan edi. Bundan tashqari, 2017-yil oktabrida viloyatning Ulug‘nor tumani hokimi Asilbek Yusupov miyaga qon quyilishi oqibatida vafot etgan.
Izoh (0)