27 июль куни Маҳалла ва оилани қўллаб-қувватлаш вазирлиги халқаро шериклари билан «Ўзбекистондаги қишлоқ аёлларининг иқтисодий имкониятларини кенгайтириш» лойиҳаси бўйича халқаро грант шартномасини имзолади. Бу ҳақда вазирлик матбуот хизмати хабар берди.
Япония ҳукумати Ижтимоий ривожланиш фонди (JSDF) орқали ушбу мақсадларга 2,7 миллион доллардан ортиқ маблағ ажратади. Лойиҳа 2021—2024 йиллар давомида Жаҳон банки билан ҳамкорликда Жиззах ва Фарғона вилоятининг олис қишлоқларида амалга оширилади.
Шартнома маҳалла ва оилани қўллаб-қувватлаш вазири Раҳмат Маматов, Жаҳон банкининг Ўзбекистондаги ваколатхонаси раҳбари Марко Мантованелли ҳамда Япониянинг Ўзбекистондаги элчиси Ёшинори Фуджияма томонидан имзоланган.
Лойиҳанинг мақсади чекка қишлоқ ҳудудлардаги «аёллар дафтари»га киритилган хотин-қизларнинг тадбиркорлик кўникмаларини ривожлантириш, бандлигини таъминлаш ҳамда оилаларнинг иқтисодий имкониятларини кенгайтиришдан иборат.
Иккинчи босқичда 350 та бизнес лойиҳа учун 1,5 миллион доллар ажратиш орқали қишлоқ ҳудудидаги аёллар тадбиркорлик фаолиятига жалб қилинади ҳамда грант доирасида молиялаштирилмаган бизнес лойиҳалар белгиланган тартибда тижорат банклари орқали амалга оширилади.
Эслатиб ўтамиз, 2020 йилда Ўзбекистонда аёлларни тадбиркорликка ўқитиш ва бандлигини таъминлаш учун 2 миллион доллар кредит ажратилиши маълум бўлганди.
Изоҳ (0)