Ўзбекистон 2021 йил бошидан бери давлат активларини хусусийлаштиришдан қанча фойда кўргани маълум қилинди

Ўзбекистонда 2021 йилнинг биринчи ярмида давлат активлари жами 1,1 триллион сўм (105 миллион доллар)га сотилди. Таққослаш учун: ўтган тўрт йил (2016—2020) ичида давлат хусусийлаштиришдан атиги 150 миллион доллар ишлаб топган. Бу ҳақда Давлат активларини бошқариш агентлиги (ДАБА) директори Акмалхон Ортиқов IntelliNews’га берган интервьюсида маълум қилди, дея хабар бермоқда «Gazeta.uz».

Унга кўра, 2021 йилнинг олти ойида объектларни сотишдан тушган маблағларнинг аксарияти (80 миллион доллар) 10 та йирик объект ҳисобига тўғри келди. Ичан қалъа меҳмонхонаси ва Давлат хавфсизлик хизматининг собиқ маъмурий биноси шулар жумласидан.

Шунингдек, 2021 йилда 900 дан ортиқ давлат активлари сотувга қўйилади.

«Агар биз ўз мақсадларимизга эришсак, бу йил хусусийлаштириш жараёнидан 600 миллион долларгача даромад олишни кутмоқдамиз», — деди Акмалхон Ортиқов.

Савдога қўйилган активлар орасида Ўзбекистондаги иккинчи энг йирик нефтни қайта ишлаш заводи — Фарғона нефтни қайта ишлаш заводининг 100 фоизи, Coca-Cola Bottlers Uzbekistan компаниясининг назорат пакети (57,1 фоиз), Кафолат суғурта компаниясининг 48 фоизи ва тўққизта шароб ва спиртли ичимликлар ишлаб чиқарувчиси бор. Молия соҳасида ДАБА иккита кичик банк — Пойтахт банки ва «Ўзагроэкспортбанк» учун таклиф олган.

Агентлик раҳбари давлат активларини сотишда фавқулодда муваффақият қозонишининг сабабларидан бири баҳолаш билан боғлиқ деб ҳисоблайди. Нашр Акмалхон Ортиқовга иқтибос келтирган ҳолда, ўтмишдаги муваффақиятсиз хусусийлаштиришнинг асосий сабаби бозор кутилмаларига мос келмайдиган реал бўлмаган тахминлар эканлигини таъкидлади.

«Айни пайтда биз ушбу янги стандартлар халқаро молия институтлари кўмаги билан ишлаб чиқилган бўлса ҳам, нима учун ишламаётганини танқидий равишда баҳолаяпмиз. Бизнинг маҳаллий баҳоловчиларимиз компанияларни баҳолаганда, улар таклиф қилган нарх компанияларнинг бозор қийматини акс эттирмайди. Бу нарх ёки жуда қиммат, ёки объектив нархдан анча паст бўлади», — деди Акмалхон Ортиқов.

Бундан аввал «Белдирсой» дам олиш маскани дор йўли билан бирга қўшиб сотилиши мумкинлиги ҳамда Гулнора Каримовага тегишли бўлган «Сижжак» оромгоҳига харидор чиқмагани сабаб уни сотиб олишга таклифларни қабул қилиш муддати узайтирилгани ҳақида хабар берилганди.