Internet tarmog‘ida fuqarolar va ichki ishlar organlari xodimi o‘rtasidagi kelishmovchilik aks etgan video tarqaldi. IIBB mazkur holat yuzasidan ma’lumot berdi.
Qayd etilishicha, 2021-yil 24-iyul kuni Shayxontohur tumani IIO FMB patrul-post xizmati xodimi safdor Shavkat Po‘latov “Samarqand darvoza” KSM hududida xizmat olib borgan.
Uning vazifasi jamoat tartibini saqlash, fuqarolar xavfsizligini ta’minlash va jinoyatlarning oldini olishdan iborat. Soat 16:30 atrofida umumiy ovqatlanish joyida ikki nafar fuqaro jamoat tartibini buzib, shovqin ko‘tarib atrofdagilarni xavotirga solgan. Shu sababli qo‘riqlash xizmati ishchilari tartibbuzarlardan KSMni tark etishini talab qilgan.
Shundan so‘ng yigitlar taqiqni chetlab o‘tib binoga avtoturargohning beshinchi qavati orqali kirishga qaror qilganida, ularni Shayxontohur tumani IIO FMB xodimi to‘xtatgan.
Savdo markazini tark etish to‘g‘risidagi iltimosga javoban fuqarolar ig‘vogarlik qilib janjal ko‘targan va ularning huquqi poymol qilinayotganini aytib, holatni videoga tushirishni boshlagan. Kelishmovchilik cho‘zilib ketgani sababli xodim emotsional tarzda e’tiroz bildirgan, biroq tekshiruv natijasida aniqlanishicha, tartibbuzarlarga nisbatan kuch ishlatmagan.
Bundan avval Angrenda kuniga 50 ta bayonnoma yozishi aytilgan YPX xodimiga nisbatan xizmat tekshiruvi o‘tkazilgani hamda IIB xodimlari qo‘lini sindirganini aytgan andijonlik unga bosim bo‘layotganini, yo‘q qilib yuborish bilan qo‘rqitilayotganini aytgani haqida xabar berilgandi.
Izoh (0)