O‘zbekistonning AQShdagi elchisi Javlon Vahobov mamlakatning Braziliyadagi favqulodda va muhtor elchisi sifatida tayinlangani to‘g‘risidagi ishonch yorlig‘i nusxasini Braziliyaning AQShdagi elchisi Nester Forsterga topshirdi. Bu haqda “Dunyo” agentligi xabar berdi.
O‘zbekistonning AQShdagi elchixonasi ma’lumotlariga ko‘ra, marosimdan keyin Javlon Vahobov va Nester Forster o‘rtasida alohida suhbat tashkil etilgan. Nester Forster o‘zbek diplomatini yangi tayinlov bilan tabriklab, Braziliyada saqlanib qolayotgan pandemiya holati munosabati bilan, shuningdek, O‘zbekiston elchisining Braziliya Tashqi ishlar vazirligida akkreditatsiyadan o‘tishdagi kechikishlarning oldini olish maqsadida Braziliya TIV rahbariyati nomidan ishonch yorlig‘i nusxasini olish vakolati topshirilganini ma’lum qilgan.
Nester Forster O‘zbekiston—Braziliya munosabatlarini har tomonlama rivojlantirish uchun barcha zaruriy sa’y-harakatlarni amalga oshirishga tayyorligini, qishloq xo‘jaligi, sanoat va mashinasozlik sohalarida qo‘shma savdo-iqtisodiy loyihalarni ishlab chiqishga qiziqishini hamda kadrlar tayyorlash sohasida sheriklik aloqalarini o‘rnatishga tayyorligini tasdiqlagan.
Shuningdek, elchi O‘zbekistonda biznes yuritishning yangi shartlarini, hukumat tomonidan mamlakat bozoriga kirishda, yengil sanoat mahsulotlarini olib kirishda, shuningdek, qishloq xo‘jaligiga qiziqqan xorijiy investorlarga berilayotgan imtiyoz va preferensiyalarni ijobiy baholagan.
Ta’kidlash kerakki, O‘zbekiston va Braziliya o‘rtasidagi savdo-iqtisodiy hamkorlik faol rivojlanmoqda, so‘nggi ikki yil ichida ikki mamlakat o‘rtasidagi savdo hajmi 78 foizga o‘sgan va Lotin Amerikasining eng yirik iqtisodiyotiga mahalliy tovarlarni eksport qilish 7 baravar oshgan.
Eslatib o‘tamiz, Javlon Vahobov 2017-yildan beri O‘zbekistonning AQShdagi elchisi sifatida ishlab kelmoqda. Javlon Vahobov, shuningdek, O‘zbekistonning Kanadadagi elchisi (qarorgohi — Vashingtonda) ham hisoblanadi.
Izoh (0)