O‘zbekiston Moliya vazirligi buyrug‘iga asosan Sarvarbek Ahmedov Kapital bozorini rivojlantirish departamenti direktori lavozimiga tayinlandi. Bu haqda vazirlik matbuot xizmati xabar berdi.
Sarvarbek Ahmedov 1985-yil Xorazm viloyatida tug‘ilgan. 2005-yilda Jahon iqtisodiyoti va diplomatiya universitetini (bakalavr), 2008-yilda Manchester universitetini (Buyuk Britaniya), 2019-yilda Milliy tadqiqot universitetining Iqtisodiyot oliy maktabini (Rossiya) tamomlagan.
Mehnat faoliyatini 2008-yilda Goldman Sachs International (London) valyuta operatsiyalari departamenti xodimi sifatida boshlagan.
2011—2014-yillarda Goldman Sachs International (London) valyuta va boshqa moliyaviy derivativlar operatsiyalari departamentida yetakchi xodim, 2014—2016-yillarda moliyaviy derivativlar operatsiyalari departamenti bo‘lim boshlig‘i, vise-prezident lavozimlarida faoliyat yuritgan. 2016—2019-yillarda Goldman Sachs Bank MChJda (Moskva) moliyaviy instrumentlar va g‘aznachilik operatsiyalari departamenti vise-prezidenti bo‘lgan.
Sarvarbek Ahmedov 2019—2021-yillarda O‘zbekiston Moliya vazirligi Xalqaro reyting va indekslar bilan ishlash boshqarmasi boshlig‘i, Moliya vazirligi G‘aznachilik boshlig‘i o‘rinbosari va birinchi o‘rinbosari lavozimlarida faoliyat yuritgan.
Eslatib o‘tamiz, O‘zbekistonda ikki yil avval tashkil qilingan Kapital bozorini rivojlantirish agentligi 2021-yilning 3-aprelida tugatilib, agentlikning barcha vakolatlari, funksiya, vazifalari va mol-mulki Moliya vazirligiga o‘tkazilgandi.
2021-yilning 13-aprelida tugatilgan agentlik o‘rniga Kapital bozorini rivojlantirish departamenti tashkil etildi.
Izoh (0)