Интернет тармоғида фуқаролар ва ички ишлар органлари ходими ўртасидаги келишмовчилик акс этган видео тарқалди. ИИББ мазкур ҳолат юзасидан маълумот берди.
Қайд этилишича, 2021 йил 24 июль куни Шайхонтоҳур тумани ИИО ФМБ патруль-пост хизмати ходими сафдор Шавкат Пўлатов «Самарқанд дарвоза» КСМ ҳудудида хизмат олиб борган.
Унинг вазифаси жамоат тартибини сақлаш, фуқаролар хавфсизлигини таъминлаш ва жиноятларнинг олдини олишдан иборат. Соат 16:30 атрофида умумий овқатланиш жойида икки нафар фуқаро жамоат тартибини бузиб, шовқин кўтариб атрофдагиларни хавотирга солган. Шу сабабли қўриқлаш хизмати ишчилари тартиббузарлардан КСМни тарк этишини талаб қилган.
Шундан сўнг йигитлар тақиқни четлаб ўтиб бинога автотураргоҳнинг бешинчи қавати орқали киришга қарор қилганида, уларни Шайхонтоҳур тумани ИИО ФМБ ходими тўхтатган.
Савдо марказини тарк этиш тўғрисидаги илтимосга жавобан фуқаролар иғвогарлик қилиб жанжал кўтарган ва уларнинг ҳуқуқи поймол қилинаётганини айтиб, ҳолатни видеога туширишни бошлаган. Келишмовчилик чўзилиб кетгани сабабли ходим эмоционал тарзда эътироз билдирган, бироқ текширув натижасида аниқланишича, тартиббузарларга нисбатан куч ишлатмаган.
Бундан аввал Ангренда кунига 50 та баённома ёзиши айтилган ЙПХ ходимига нисбатан хизмат текшируви ўтказилгани ҳамда ИИБ ходимлари қўлини синдирганини айтган андижонлик унга босим бўлаётганини, йўқ қилиб юбориш билан қўрқитилаётганини айтгани ҳақида хабар берилганди.
Изоҳ (0)