O‘zbekiston hududida bukmekerlik va totalizator faoliyatini amalga oshirish uchun biror-bir xo‘jalik yurituvchi subyektlarga litsenziya berilmagan. Bu haqda Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligi xabar berdi.
O‘zbekiston Prezidentining 2019-yil 4-dekabrdagi “O‘zbekistonda futbolni rivojlantirishni mutlaqo yangi bosqichga olib chiqish chora-tadbirlari to‘g‘risida”gi farmoniga muvofiq, O‘zbekistonda 2021-yil 1-yanvardan boshlab Kapital bozorini rivojlantirish agentligi tomonidan litsenziya olish orqali bukmekerlik faoliyatini amalga oshirishga ruxsat berish nazarda tutilgan edi.
Shu bilan birga, onlayn qimor bilan shug‘ullanuvchi tashkilotlar, ishtirokchilar majburiyatlarini tartibga solish, kelishilgan o‘yinlarning oldini olish maqsadida Kapital bozorini rivojlantirish agentligiga Ma’muriy va Jinoyat kodeksiga tegishli qo‘shimcha hamda o‘zgartirishlar kiritish vazifasi yuklatilgan.
Ma’lumot uchun, Kapital bozorini rivojlantirish agentligi aprel oyining boshida tugatilgan va uning barcha vakolatlari Moliya vazirligiga o‘tkazilgan edi.
Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligi 2021-yil 1-yanvardan kuchga kirgan Prezident farmoni ijrosini o‘rganish olib borgan. Shu maqsadda, agentlik mart oyida Kapital bozorini rivojlantirish agentligiga so‘rov xati yuborgan.
Kapital bozorini rivojlantirish agentligi 2021-yil 25-martda taqdim etgan ma’lumotda o‘sha vaqtda litsenziyalash bo‘yicha hukumatning qaror loyihalari ishlab chiqilayotgani hamda O‘zbekiston hududida bukmekerlik va totalizator faoliyatini amalga oshirish uchun biron-bir xo‘jalik yurituvchi subyektlarga litsenziya berilmagani qayd etilgan.
“Yuqoridagilarga asoslanib, Ma’muriy javobgarlik to‘g‘risidagi kodeksning 191-moddasiga (qimor va tavakkalchilikka asoslangan boshqa o‘yinlar) va Jinoyat kodeksining 278-moddalariga (qimor va tavakkalchilikka asoslangan boshqa o‘yinlarni tashkil etish hamda o‘tkazish) muvofiq bukmekerlik va totalizator kabi faoliyat turi hali ham qonuniy emas”, — deyiladi xabarda.
Avvalroq bosh vazir o‘rinbosari Aziz Abduhakimov bukmekerlikni qonuniylashtirishning qo‘shimcha afzalliklari borligi, ko‘ngilochar o‘yinlardan olinadigan foydaning ma’lum bir foizi majburiy to‘lov sifatida davlat g‘aznasiga tushishini ma’lum qilgandi.
Izoh (0)