29-iyul kuni Jahon sog‘liqni saqlash tashkilotining COVAX dasturi orqali O‘zbekistonga AQShning Alabama shtatidan vaksinalar partiyasi olib kelinadi, deb xabar beradi “Dunyo” agentligi.
O‘zbekiston elchixonasining ma’lumotlariga ko‘ra, AQSh koronavirusga qarshi Moderna kompaniyasining 3 million dozasini bepul taqdim etadi.
AQSh Kasalliklar nazorati va profilaktikasi markazining ma’lumotlariga ko‘ra, Moderna kompaniyasining vaksinasi koronavirusga qarshi 94 foiz samaradorlikka ega. AQShning FDA boshqarmasi esa Moderna vaksinasidan 18 va undan katta yoshdagilarda foydalanishga ruxsat bergan. Mazkur vaksina mushak ichiga yuboriladi. Vaksinatsiya kursi ikki dozadan iborat bo‘lib, bir oy farq bilan qilinadi.
Moderna vaksinasini Pfizer va BioNTech farmatsevtika kompaniyalarining dori vositalaridan farqli ravishda uni normal sovuq haroratda saqlash mumkin, bu esa uni O‘zbekiston viloyatlari bo‘ylab tarqatilishini osonlashtiradi.
Avvalroq O‘zbekistonga yana 1 million doza ZF-UZ-VAC2001 va 50 ming doza AstraZeneca vaksinalari olib kelingan edi.
Mavzuga doir: O‘zbekistonda “Sputnik V” vaksinasini ishlab chiqarish yaqin orada yo‘lga qo‘yilishi aytildi
Izoh (0)