Qarshi xalqaro aeroportidan Rossiyaning Sankt-Peterburg shahriga uchishi kerak bo‘lgan samolyot yuki og‘irligi sabab reys qoldirdi. Bu haqda “Daryo”ga ayni paytda aeroportda bo‘lib turgan yo‘lovchilar xabar berdi.
Ta’kidlanishicha, Qarshidan Sankt-Peterburgga yo‘l olishi kerak bo‘lgan samolyot bugun, 27-iyul kuni soat 05:20 da havoga ko‘tarilishi kerak bo‘lgan.
“Biroq ko‘p yo‘lovchilarga chipta sotilgani va kam sig‘imli samolyot kelgani bois yo‘lovchilar va yo‘lovchilarning yuki samolyotga og‘irlik qilmoqda. Shu bois rossiyalik uchuvchi uchishdan bosh tortmoqda”, — deydi muammo haqida xabar bergan yo‘lovchilardan biri Dilshod Xurramov.
Yo‘lovchining ma’lumot berishicha, aeroport xodimlari yo‘lovchilarga samolyotga chiqishni, yuki og‘ir bo‘lsa-da, samolyot manzilga ketishini ma’lum qilgan. Biroq rossiyalik uchuvchi bu holatda uchmasligini, xavfli ekanini bildirgan.
“Aeroport mas’ullari, IIB xodimlari yo‘lovchilarga aeroport ichkarisiga kirib o‘tirishni taklif qilmoqda. Yo‘lovchilar esa reys qoldirilgani bois biletga sarflagan puli kuyishdan xavotirda”, — deydi Dilshod Xurramov.
Dilshod Xurramovning ma’lumot berishicha, ayni paytda aeroport hovlisida 200 ga yaqin yo‘lovchi manzilga ketishini aytib, aeroport mas’ullaridan samolyot topib berishni so‘ramoqda.
“Mana soat 09:42 bo‘ldi. Bizning reys soat 05:20 da edi. Rossiyalik uchuvchi mening ish vaqtim tugadi, deb endi uchishni ham rad etmoqda. Aksariyat yo‘lovchilar uzoq tumanlardan bo‘lgani sabab Qarshi xalqaro aeroportiga kechki soat 01:00 da kelgan. Hozir hamma och va asabi taranglashgan”, — deydi reysi qoldirilgan yo‘lovchilardan yana biri Doniyor Abdurasulov.
Izoh (0)