Yaponiyaning Tokio shahrida bo‘lib o‘tayotgan Olimpiya o‘yinlarida 26-iyul kuni o‘zbekistonlik sportchilar ishtirokidagi bir qator uchrashuvlar yakunlandi.
Qilichbozlikning sablya yo‘nalishida O‘zbekiston sharafini himoya qilayotgan Zaynab Dayibekova chorak finalda vengriyalik Anna Martonga qarshi bellashdi. Unda Dayibekova 11:15 hisobida imkoniyatni boy berib qo‘ydi va o‘z ishtirokini yakunladi.
18 yoshli Dayibekova dastlabki bosqichda yaponiyalik Aoki Chikani 15:9 hisobida mag‘lub etdi. 1/16 finalda o‘zbekistonlik qilichboz Osiyo o‘yinlari finalchisi xitoylik Yatsi Shaoni 15:10 hisobida taslim qildi. Dayibekovaning keyingi raqibi Janubiy Koreya vakili Ji Su Yon bo‘ldi. Ushbu jangda Zaynab 15:12 hisobida g‘alaba qozondi.
Dzyudochi Hikmatulloh To‘rayev (-73 kg) 1/8 finalda janubiy koreyalik Chan Rim Anga yutqazib qo‘ydi (0:1) va Olimpiadadagi ishtirokini yakunladi. To‘rayev 1/16 finalda germaniyalik Igor Vandtkeni mag‘lubiyatga uchratgandi.
Shuningdek, taekvondochi Nigora Tursunqulova uchun ham Olimpiada rasman yakunlandi. Agar 1/8 finalda Nigorani mag‘lub etgan Mengyu Chjan finalga chiqa olganida, o‘zbekistonlik sportchi bronza uchun jang qilishi mumkin edi. Biroq xitoylik taekvondochi chorak finalda yutqazib qo‘ydi.
Izoh (0)