Токио—2020. Зайнаб Дайибекова венгриялик қиличбозга мағлуб бўлди, дзюдочи Ҳикматуллоҳ Тўраев ва таэквондочи Нигора Турсунқулова ҳам Олимпиададаги иштирокини якунлади

Япониянинг Токио шаҳрида бўлиб ўтаётган Олимпия ўйинларида 26 июль куни ўзбекистонлик спортчилар иштирокидаги бир қатор учрашувлар якунланди.

Қиличбозликнинг сабля йўналишида Ўзбекистон шарафини ҳимоя қилаётган Зайнаб Дайибекова чорак финалда венгриялик Анна Мартонга қарши беллашди. Унда Дайибекова 11:15 ҳисобида имкониятни бой бериб қўйди ва ўз иштирокини якунлади.

18 ёшли Дайибекова дастлабки босқичда япониялик Аоки Чикани 15:9 ҳисобида мағлуб этди. 1/16 финалда ўзбекистонлик қиличбоз Осиё ўйинлари финалчиси хитойлик Яци Шаони 15:10 ҳисобида таслим қилди. Дайибекованинг кейинги рақиби Жанубий Корея вакили Жи Су Ён бўлди. Ушбу жангда Зайнаб 15:12 ҳисобида ғалаба қозонди.

Дзюдочи Ҳикматуллоҳ Тўраев (-73 кг) 1/8 финалда жанубий кореялик Чан Рим Анга ютқазиб қўйди (0:1) ва Олимпиададаги иштирокини якунлади. Тўраев 1/16 финалда германиялик Игорь Вандткени мағлубиятга учратганди.

Шунингдек, таэквондочи Нигора Турсунқулова учун ҳам Олимпиада расман якунланди. Агар 1/8 финалда Нигорани мағлуб этган Менгю Чжан финалга чиқа олганида, ўзбекистонлик спортчи бронза учун жанг қилиши мумкин эди. Бироқ хитойлик таэквондочи чорак финалда ютқазиб қўйди.