Yaponiyalik 13 yoshli sportchi Momizi Nisiya Tokio—2020 Olimpiadasida skeytbording bo‘yicha oltin medalni qo‘lga kiritdi.
Nisiya strit mashqlarida umumiy hisobda 15,26 ball jamg‘ardi va musobaqa g‘olibiga aylandi. Eng qizig‘i, 14,64 ball bilan kumush medalni qo‘lga kiritgan braziliyalik Rayssa Lil ham 13 yoshda. Kuchli uchlikka yaponiyalik boshqa bir sportchi Funa Nakayama yakun yasab berdi — 14,49 ball.
Shu tariqa 13 yosh-u 330 kunlik Momizi Nisiya eng yosh Olimpiya chempionlari orasida 3-o‘rinni egalladi. Bu boradagi eng yaxshi natija amerikalik Marjori Gestringi tegishli bo‘lib, u 3 metr balandlikdan suvga sakrash bo‘yicha 13 yosh-u 268 kunligida to‘rt yillikning eng nufuzli musobaqasida g‘alaba qozongan. Ikkinchi o‘rinda esa germaniyalik Klaus Zerta qayd etilgan — 13 yosh-u 283 kun. Zerta 1960-yilgi Olimpiadada eshkak eshish (jamoaviy bahslar) bo‘yicha chempion bo‘lgan.
Tokio—2020 da skeytbord ilk bor Olimpiya o‘yinlari dasturiga kiritildi. Bundan tashqari, Yaponiyadagi musobaqada syorfing, karate va sportcha toqqa chiqish kabi sport turlari ham Olimpiadadagi debyutini o‘tkazmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)