Tokio—2020 Olimpiadasining 25-iyul, yakshanba kungi musobaqalari o‘tkazilmoqda.
Velosportning shosse yo‘nalishida ishtirok etgan o‘zbekistonlik Olga Zabelinskaya Olimpiadadagi ishtiroki yakunlandi. Zabelinskaya 137 kilometrga kechgan guruh poygasi yo‘nalishida 67 ishtirokchi orasida 9-bo‘lib marra chizig‘ini kesib o‘tdi. U ushbu masofani 3 soat 54 daqiqa 31 soniyada bosib o‘tdi.
Poygada avstriyalik Anna Kizenxofer g‘alabani qo‘lga kiritgan bo‘lsa, niderlandiyalik Annemik van Vluten kumush medalga sazovor bo‘ldi. Italiyalik Eliza Borgini esa kuchli uchlikka yakun yasab berdi.
Avvalroq o‘zbekistonlik taekvondochi Ulug‘bek Rashidov final yo‘llanmasini qo‘lga kiritgandi. Oltin medal uchun kechadigan bahsda Ulug‘bekka britaniyalik amaldagi jahon chempioni Bredli Sinden raqiblik qiladi.
Bungacha bokschi Tursunoy Rahimova (-51 kg) 1/16 finalda polshalik Sandra Drabikkani mag‘lub etib, Olimpiya o‘yinlarida g‘alabaga erishgan o‘zbekistonlik ilk ayol bokschiga aylangandi.
Izoh (0)