Токио—2020 Олимпиадасининг 25 июль, якшанба кунги мусобақалари ўтказилмоқда.
Велоспортнинг шоссе йўналишида иштирок этган ўзбекистонлик Олга Забелинская Олимпиададаги иштироки якунланди. Забелинская 137 километрга кечган гуруҳ пойгаси йўналишида 67 иштирокчи орасида 9-бўлиб марра чизиғини кесиб ўтди. У ушбу масофани 3 соат 54 дақиқа 31 сонияда босиб ўтди.
Пойгада австриялик Анна Кизенхофер ғалабани қўлга киритган бўлса, нидерландиялик Аннемик ван Влутен кумуш медалга сазовор бўлди. Италиялик Элиза Боргини эса кучли учликка якун ясаб берди.
Аввалроқ ўзбекистонлик таэквондочи Улуғбек Рашидов финал йўлланмасини қўлга киритганди. Олтин медал учун кечадиган баҳсда Улуғбекка британиялик амалдаги жаҳон чемпиони Бредли Синден рақиблик қилади.
Бунгача боксчи Турсуной Раҳимова (-51 кг) 1/16 финалда польшалик Сандра Драбиккани мағлуб этиб, Олимпия ўйинларида ғалабага эришган ўзбекистонлик илк аёл боксчига айланганди.
Изоҳ (0)