24-iyul kuni O‘zbekiston Prezidenti Shavkat Mirziyoyev va Turkmaniston prezidenti Gurbanguli Berdimuhamedovning telefon orqali muloqoti bo‘lib o‘tdi. Bu haqda davlat rahbari matbuot xizmati xabar berdi.
Turkmaniston yetakchisi Shavkat Mirziyoyevni tug‘ilgan kuni bilan samimiy tabriklab, birodar O‘zbekiston xalqiga tinchlik-osoyishtalik va ravnaq tilgan.
O‘zbekiston—Turkmaniston do‘stlik, yaxshi qo‘shnichilik va strategik sheriklik munosabatlarini yanada kengaytirishning dolzarb masalalari ko‘rib chiqilgan.
“Mamlakatlarimiz o‘rtasidagi ko‘p qirrali hamkorlik, eng avvalo, savdo-iqtisodiy, transport-kommunikatsion va madaniy-gumanitar sohalarda jadal rivojlanib borayotgani mamnuniyat bilan qayd etildi. Qo‘shma Hukumatlararo komissiyaning navbatdagi yig‘ilishini o‘tkazishga kelishib olindi”, — deyiladi xabarda.
Prezidentlar 2021-yil 6-avgust kuni “Avaza” milliy turizm hududida o‘tkaziladigan Markaziy Osiyo davlatlari rahbarlarining maslahat uchrashuviga tayyorgarlik ko‘rish masalasiga alohida to‘xtalgan. Bo‘lajak tadbirning kun tartibi va dasturi yuzasidan fikr almashilgan.
Turkmaniston prezidenti O‘zbekiston yetakchisini Toshkentda Markaziy va Janubiy Osiyoning bog‘liqligini mustahkamlash bo‘yicha yuqori darajadagi xalqaro konferensiya muvaffaqiyatli o‘tkazilgani bilan ham samimiy qutlab, ushbu forumning samarali natijalari keng mintaqada amaliy hamkorlik loyihalarini ilgari surish uchun yaxshi asos bo‘lib xizmat qilishini ta’kidlagan.
Avvalroq Qozog‘iston prezidenti Qosim-Jo‘mart To‘qayev va Tojikiston prezidenti Emomali Rahmon Shavkat Mirziyoyev bilan telefon orqali suhbatlashib, tug‘ilgan kuni bilan tabriklagani to‘g‘risida xabar berilgandi.
Izoh (0)