O‘zbekiston Prezidenti Shavkat Mirziyoyev 24-iyul kuni Rossiya prezidenti Vladimir Putin bilan telefon orqali muloqot qildi, deb xabar beradi davlat rahbari matbuot xizmati.
Suhbat avvalida Rossiya prezidenti Shavkat Mirziyoyevni tavallud ayyomi bilan dildan muborakbod etib, O‘zbekiston xalqiga tinchlik, farovonlik va bardavom ravnaq tilagan.
O‘zbekiston—Rossiya strategik hamkorlik va ittifoqchilik munosabatlarining dolzarb masalalari ko‘rib chiqilgan, oliy darajadagi tadbirlar rejasi muhokama qilingan.
“Mamlakatlarimiz o‘rtasidagi ko‘p qirrali hamkorlik jadal sur’atlar bilan rivojlanayotgani, eng avvalo, o‘zaro tovar ayirboshlash barqaror ortib borayotgani, iqtisodiyot tarmoqlarida qo‘shma kooperatsiya loyihalari va madaniy-gumanitar almashinuv dasturlari muvaffaqiyatli amalga oshirilayotgani mamnuniyat bilan qayd etildi. O‘zbekistonda koronavirusga qarshi vaksinalar ishlab chiqarish bo‘yicha qo‘shma quvvatlarni tez fursatda ishga tushirish muhim ekani ta’kidlandi”, — deyiladi xabarda.
Yetakchilar mintaqa kun tartibi, shu jumladan, Afg‘oniston bo‘yicha yuzaga kelayotgan vaziyat xususida fikr almashgan.
Ma’lumot uchun, O‘zbekiston Prezidenti 24-iyul kuni 64 yoshga to‘ldi.
Avvalroq Qozog‘iston prezidenti Qosim-Jo‘mart To‘qayev, Tojikiston prezidenti Emomali Rahmon, Turkmaniston prezidenti Gurbanguli Berdimuhamedov Shavkat Mirziyoyev bilan telefon orqali suhbatlashib, tug‘ilgan kuni bilan tabriklagani to‘g‘risida xabar berilgandi.
Izoh (0)