24-iyul kuni O‘zbekiston Prezidenti Shavkat Mirziyoyev va Tojikiston prezidenti Emomali Rahmonning telefon orqali muloqoti bo‘lib o‘tdi. Bu haqda davlat rahbari matbuot xizmati xabar berdi.
Suhbat avvalida Tojikiston prezidenti Shavkat Mirziyoyevni tavallud kuni bilan tabriklab, O‘zbekistonning ko‘p millatli xalqiga tinchlik-osoyishtalik, farovonlik va ravnaq tilagan.
Shuningdek, 10—11-iyun kunlari O‘zbekiston Prezidentining Tojikistonga rasmiy tashrifi yakunlari bo‘yicha qabul qilingan bitim va kelishuvlarni amalga oshirish masalalari ko‘rib chiqilgan. Mintaqa kun tartibi, shu jumladan, Afg‘onistondagi vaziyatning rivojlanishi yuzasidan fikr almashilgan.
“O‘tgan haftada Toshkentda o‘tgan Markaziy va Janubiy Osiyo bog‘liqligi bo‘yicha xalqaro konferensiyaning muvaffaqiyatli natijalari yuksak baholandi. Kelgusi oyning boshida Turkmanistonda mintaqa davlatlari rahbarlarining navbatdagi Maslahat uchrashuvini hamda joriy yilning sentabr oyida Tojikistonda Shanxay hamkorlik tashkiloti sammitini o‘tkazishga tayyorgarlik masalasi muhokama qilindi”, — deyiladi xabarda.
Avvalroq O‘zbekiston Prezidentining katta qizi, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyeva Shavkat Mirziyoyevni 64 yoshga to‘lishi munosabati bilan tabriklagandi.
Izoh (0)