Марказий сайлов комиссиясининг 23 июль, жума куни бўлиб ўтган навбатдаги йиғилишида Президент сайлови сабаб 2021 йилнинг 24–25 май кунлари Ўзбекистонга ташриф буюрган ЕХҲТ Демократик институтлар ва инсон ҳуқуқлари бўйича бюросининг Эҳтиёжларни баҳолаш миссияси экспертлари хулосалари тўғрисидаги саволга жавоб берилди. Бу ҳақда «Дарё» мухбири хабар қилмоқда.
«Эҳтиёжларни баҳолаш миссияси бўлажак сайловларга бюро томонидан юбориладиган кузатувчиларнинг ҳажмини, кўламини ва мандатини аниқлаб бериш учун келади. Шунинг учун ҳам миссиянинг ташрифи давомида бир қатор давлат ва нодавлат ташкилотлари, ОАВ вакиллари билан учрашувлар ташкил этилди.
Миссиянинг вазифаси ҳозирги бўлаётган ўзгаришлар ва сайловга тайёргарлик ҳолатини баҳолаш эди. Уларнинг ҳисоботи 19 июль куни эълон қилинди ва унда қисқача Ўзбекистондаги сайловга тайёргарлик ҳолати, сайлов ўтказишда норматив-ҳуқуқий база мавжудлигига ҳам баҳо бериб ўтилди.
Шуни алоҳида таъкидлаш керакки, миссия ҳисоботида сайловга тайёргарлик ҳолатидан ташқари, 2019 йилдан кейинги даврда сайлов тизими, сайлов қонунчилиги ва сайлов амалиётида амалга оширилган ишларга ҳам баҳо бериб ўтилган, яъни миссиянинг ўтган сайловларда берган тавсияларининг сайлов қонунчилиги ва сайлов амалиётига жорий этилиши ижобий баҳоланган», — деди Марказий сайлов комиссияси раиси ўринбосари Баҳром Қўчқоров.
Унинг таъкидлашича, миссия ҳисоботида сайловга тайёргарлик жараёнлари ижобий баҳоланган.
«Шунингдек, сайлов кампаниясида оммавий тадбирларни ўтказиш, туҳматга бўлган жавобгарликни енгиллаштириш, сайлов кампанияси даврида давлат ресурсларидан ноқонуний фойдаланишни тақиқлаш, шу жумладан, давлат мансабдор шахсларининг ҳам сайлов кампанияси тарғибот ишларида иштирокини тақиқлаш, сайловларни молиялаштириш борасидаги очиқликни таъминлаш, сиёсий партиялар томонидан оралиқ ва даврий ҳисоботларнинг тақдим этилиши жуда ижобий баҳоланган. Бу миссия ҳисоботида акс этган ва ҳисобот ҳамма учун очиқ. Ҳисобот бюронинг расмий веб-сайтида ҳам батафсил эълон қилинган.
Миссиянинг ҳисоботидан сайловга тайёргарлик жараёнлари, яъни сайловга иштирокчиларни тайёрлаш, уларнинг малакасини ошириш, ўтказилаётган тренинглар, бундан ташқари, сайловга тайёргарлик жараёнида норматив-ҳуқуқий базани такомиллаштириш масалалари ҳам ўрин олган ва ижобий баҳо берилган», — деди МСК вакили.
Изоҳ (0)