“Ishtiyoqim so‘ndi”. Oksana Chusovitina Tokio Olimpiadasida O‘zbekiston bayroqdorlarining o‘zgartirilishi haqida

O‘zbekistonlik gimnastikachi Oksana Chusovitina Tokiodagi Olimpiya o‘yinlari boshlanishiga bir kun qolganda O‘zbekiston bayroqdorlari o‘zgarishiga munosabat bildirdi.

“Nega o‘zgarish bo‘lgani haqida menga hech kim izoh bermadi, men bormasligimni aytishdi, xolos. Ishtiyoqim so‘ndi. Bunday qilish kerak emas. Shunchaki tushuntirish mumkin edi, axir hammamiz odammiz, tushunamiz”, — deya Chusovitinadan iqtibos keltiradi “Sputnik Uzbekistan”.

Qayd etish joiz, avvalroq Milliy olimpiya qo‘mitasi matbuot xizmati Olimpiada ochilish marosimida O‘zbekistonning ikki bayroqdoridan biri Oksana Chusovitina bo‘lishini e’lon qilingandi. Ikkinchisi esa boks bo‘yicha terma jamoa a’zosi Bobousmon Boturov bo‘lishi lozim edi.

Biroq ochilish marosimiga bir kun qolganda bayroqdorlar o‘zgardi va bokschi Bahodir Jalolov va taekvondochi Nigora Tursunqulova O‘zbekiston bayroqdorlari bo‘lishi e’lon qilindi. Bunga MOQ vakili quyidagicha izoh bergan:

XOQ tavsiyasiga ko‘ra, har bir davlatdan bir ayol va bir erkak nomdor sportchi bayroqdor bo‘ladi. O‘zbekiston bayroqdorlarini tanlashda avvalambor har bir sport turi bo‘yicha musobaqalar jadvali, qolaversa barcha delegatlar va sportchilarning fikrini inobatga olgan holda, bu vazifa bokschi Bahodir Jalolov va taekvondochi Nigora Tursunqulovaga ishonib topshirildi.

Oybek Qosimov, MOQ bosh kotibi