Dunyo va o‘zbek sportiga oid 21-iyul kunining muhim xabarlari dayjesti bilan tanishing.
O‘zbekiston
O‘zbekiston terma jamoasi hujumchisi Igor Sergeyevning “Tobol”ga o‘tgani haqida xabar berilgandi. Shundan so‘ng OAVda kostanayliklar Sergeyev uchun “Aqto‘be”ga 70 ming dollar bergani xabar qilindi. Biroq klub matbuot xizmati bayonot bilan chiqib, futbolchi OAVda chiqqan summadan ikki baravar kamroqqa sotib olinganini ma’lum qildi. Shuningdek, “Aqto‘be”ga ushbu summa bo‘lib-bo‘lib to‘lanishi qo‘shimcha qilingan.
O‘zbekiston Milliy olimpiya qo‘mitasi “Ozodlik” radiosining o‘zbek xizmati tomonidan 21-iyul kuni e’lon qilingan “Tokioga yo‘l olgan o‘zbek yengil atletikachilari prezident va’da qilgan mukofot pulini kutmoqda” sarlavhali maqola yuzasidan rasmiy bayonot berdi va maqolada ilgari surilgan da’vo haqiqatga to‘g‘ri kelmasligini ma’lum qildi.
Xalqaro Olimpiya qo‘mitasi (XOQ) 2032-yilgi yozgi Olimpiya va Paralimpiya o‘yinlariga Avstraliyaning Brisben shahri mezbonlik qilishi haqida ma’lum qildi. Shu tariqa Avstraliya uchinchi marta Olimpiadaga mezbonlik qiladigan bo‘ldi. Bundan avval “yashil qit’a” 1956-yil (Melburn) va 2000-yilda (Sidney) yozgi o‘yinlarni o‘zida qabul qilgandi.
Jizzaxning “So‘g‘diyona” klubi Tojikistonning amaldagi chempioni “Istiqlol” klubiga qarshi o‘rtoqlik uchrashuvida maydonga tushdi.
Toshkentda kechgan uchrashuvda “So‘g‘diyona” futbolchilari 2:0 hisobida zafar quchdi. O‘yindagi har ikkala golga ham hujumchi Shohruz Norxonov mualliflik qildi.
Jahon
“Liverpul” va Muhammad Saloh yangi shartnoma borasida muzokara o‘tkazmoqda, deya yozadi The Times nashri. Misrlik futbolchining “qizillar” bilan amaldagi shartnomasi 2023-yilda o‘z nihoyasiga yetadi.
Avvalroq “Liverpul”ning darvozabon Alisson, himoyachi Virjil van Deyk va Fabinyo bilan shartnomani uzaytirmoqchi ekanligi haqida xabar qilingandi.
A Seriya formatida jiddiy o‘zgarishlar bo‘lishi mumkin. Italiya oliy divizioni klublari liga ishtirokchilari sonini 18 tagacha kamaytirish va pley-off tizimini joriy qilish borasida jiddiy bosh qotirmoqda. Football Italia’ning xabar qilishicha, klublar o‘zgarishlar amalga tatbiq etilishiga rozi. Bunday tizimning moliyaviy tomondan ko‘proq foyda keltirishi ularga ma’qul kelgan. Taxminlarga ko‘ra, ligadagi jamoalar soni 20 tadan 18 taga kamaytiriladi. Shuningdek, chempionlik va yuqori o‘rinlar uchun ham pley-off tizimini joriy qilish taklif qilinmoqda. Agar ushbu qaror ma’qullansa, o‘zgarishlar 2023/24-yilgi mavsumdan kuchga kiradi.
Avvalroq A Seriyada 2022/23-yilgi mavsumdan boshlab A Seriyada yashil libosdan foydalanish taqiqlangandi.
David Alaba “Real” futbolchisi sifatida tanishtirildi. Alaba “Real Madrid”da 4-raqamni oldi. Bungacha ushbu raqamda 16 yil davomida Serxio Ramos harakat qilgan.
“Real” va “Barselona” afsonalari o‘rtasidagi o‘rtoqlik uchrashuvi o‘tkazildi. Unda Madridlik sobiq futbolchilar 3:2 hisobida g‘alaba qozondi. Uchrashuvda Deku, Rivaldo, Ronaldinyo, Ronald de Bur, Roberto Karlos, Rivera, Figu, Alfonso Peres kabi mashhur nomlarni uchratish mumkin edi.
“Yuventus” Paulo Dibalani Antuan Grizmannga almashtirmaydi. “Barselona” Turin klubi futbolchilarni almashtirish taklifi bilan chiqqandi. Biroq “Yuventus” bu taklifni rad etdi. “Keksa sinyora” Pauloga yangi shartnoma taklif qilmoqchi.
Xalqaro Olimpiya qo‘mitasining (XOQ) Tokiodagi sessiyasida oltita xalqaro sport federatsiyasi qo‘mita a’zoligiga qabul qilindi. Bular:
- Sambo xalqaro federatsiyasi (FIAS);
- Xalqaro cherliding ittifoqi (ICU);
- Xalqaro muay-tay assotsiatlari federatsiyasi (IFMA);
- Xalqaro aysshtoksport federatsiyasi (IFI);
- Butunjahon kikboksing tashkilotlari assotsiatsiyasi (WAKO);
- Butunjahon lakross federatsiyasi (WL).
Izoh (0)