Тошкентнинг Яккасарой туманида дори воситаларининг ноқонуний муомалага киритилишининг олди олинди, деб хабар беради Бош прокуратура ҳузуридаги департамент.
Маълум қилинишича, Бош прокуратура ҳузуридаги департамент ҳамда ДХХнинг Яккасарой туман бўлимлари томонидан тезкор тадбир ўтказилган. Тадбирда «К» МЧЖ ходими Ф.Н. дори воситаларини ноқонуний муомалага киритиш орқали даромад орттиришни кўзлаб, харидорга Ўзбекистонда ишлаб чиқарилган «Ремдесса» 100 мг дори воситасининг ҳар бир донасини 350 минг сўмдан ҳисоблаб, 500 донасини жами 175 миллион сўмга сотган вақтида ашёвий далиллар билан ушланган.
Мазкур ҳолат юзасидан Жиноят кодексининг 186-3-моддаси (дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Сирдарёда 700 дан ортиқ «Тропикамид» дори воситасининг ноқонуний айланмасига чек қўйилгани, Тошкентдаги «Сергели» блокпостида кучли таъсир қилувчи моддалар олиб кирмоқчи бўлган шахс қўлга олингани, Тошкентда қарийб 100 миллион сўмлик кучли таъсир қилувчи дори воситаларининг ноқонуний айланмасининг олди олингани ҳақида хабар берилган эди.
Изоҳ (0)