Тошкент ва Сурхондарё вилоятларида ер сотиш билан боғлиқ фирибгарлик ҳолатлари аниқланди, деб хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Департаментнинг Зангиота туман бўлими томонидан фуқароларнинг ҳуқуқ ва манфаатларини ҳимоя қилиш юзасидан ўтказилган терговга қадар текширувда фуқаролар Р.Қ. ва Б.Р. фуқаро И.нинг ишончига кириб, унга ваколатли танишлари орқали Қибрай тумани ҳудудида жойлашган 7 гектар ер майдонини тендер савдоларига қўйиш орқали сотиб олиб беришни ваъда қилиб, эвазига 23 500 долларни фирибгарлик йўли билан қўлга киритгани аниқланган.
Департамент ҳамда ДХХнинг Ангор тумани бўлимлари томонидан ўтказилган тезкор тадбирда эса «П» фермер хўжалиги раҳбари Ҳ.Ҳ. фуқаро А.га Бандихон туманидаги давлат захирасида бўлган 2 гектар ер майдонини ўзиники эканлигини айтиб, ушбу ер майдонини фирибгарлик йўли билан сотишни режалаштириб, олдиндан келишилган 100 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Тошкент вилояти «Бочка» дам олиш маскани ҳудудидан 80 сотих ерни фуқарога 450 минг долларга сотмоқчи бўлган шахс, Бўстонлиқда от спортига ажратилган 25,4 гектар ерни 1,5 миллион долларга сотмоқчи бўлган шахс, Тошкент вилоятининг Янгийўл туманида эса 9 минг доллар эвазига фермер хўжалигининг 6 сотих ерини олиб беришни ваъда қилган шахс қўлга олинганди.
Изоҳ (0)