Тошкент вилояти Оҳангарон туманида жойлашган, умумий майдони 1,5 гектар бўлган ер қаъри участкаси сотувга чиқарилди. Бу ҳақда «E-auksion»га таяниб, Spot хабар берди.
Сотишдан мақсад геологик қидирув ишларини олиб бориш ишларини амалга оширувчи харидорларни топишдир. Ер майдонида асосан олтин қидирилиши кўзда тутилган бўлиб, лотнинг бошланғич нархи 223 миллион сўмни ташкил этади.
Аризалар июль ойининг 27-санасига қадар қабул қилинади. Савдолар 29 июлда ўтказилиши режалаштирилмоқда.
Аввалроқ Давлат активларини бошқариш агентлиги томонидан Навоий вилояти Нурота туманидаги 5 та ер участкаси сотувга чиқарилганди. 3—4,5 гектар орасида бўлган участкаларнинг бошланғич нархи 25,7—38,5 миллион сўм атрофида.
Маълумот учун, Вазирлар Маҳкамасининг 2019 йил 16 мартдаги 224-сонли қарори билан Қимматбаҳо металларни олтин изловчилар усулида қазиб олиш фаолиятини амалга ошириш тартиби тўғрисидаги низом тасдиқланган. Унга кўра, Давлат геология ва минерал ресурслар қўмитаси ер қаъри участкаларининг рўйхати тасдиқланганидан сўнг 5 кунда аукционни ўтказиш учун маълумотларни тайёрлайди. Аукцион ўтказиш ҳақидаги хабар аукциондан 5 кун олдин эълон қилиниши лозим. Аукционда иштирок этиш учун аризалар «Электрон онлайн аукционларни ташкил этиш маркази»нинг веб-сайтида қабул қилинади. Аризачи ҳисоб рақамга ер участкасининг 5 фоизи миқдорида закалат пулини жойлаштириши керак.
Изоҳ (0)