Andijon viloyati Qo‘rg‘ontepa tumanidagi dehqon bozorining mas’ul shaxslariga talon-toroj qilish moddasi bo‘yicha jinoyat ishi qo‘zg‘atildi. Bu haqda Bosh prokuratura huzuridagi Departament xabar berdi.
Ma’lum qilinishicha, Bosh prokuratura huzuridagi Departamentning Qo‘rg‘ontepa tuman bo‘limi tomonidan tergovga qadar tekshiruv o‘tkazilgan. Tekshiruvda tumandagi dehqon bozorining moddiy javobgar shaxslari MChJning 201,7 million so‘mini hech qanday asossiz ish haqi va rag‘batlantirish sifatida olgani aniqlangan. Shuningdek, ular savdo hamda xizmat ko‘rsatishdan tushgan 157 million so‘mni kirim qilmasdan, jami 358,7 million so‘m pul mablag‘larini talon-toroj qilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 207-moddasi (mansabga sovuqqonlik bilan qarash) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq O‘zbekistondagi ikkita OTM buxgalterlari 22,5 milliard so‘mni o‘zlashtirgani, O‘zbekiston Ekologiya qo‘mitasi va uning tarkibidagi tashkilotlar 9,4 milliard so‘mlik mablag‘ni noqonuniy sarflagani, O‘zbekistonda beshta vazirlik 61 milliard so‘mni talon-toroj qilishining oldi olingani to‘g‘risida xabar berilgandi.
Izoh (0)