Андижон вилояти Қўрғонтепа туманидаги деҳқон бозорининг масъул шахсларига талон-торож қилиш моддаси бўйича жиноят иши қўзғатилди. Бу ҳақда Бош прокуратура ҳузуридаги Департамент хабар берди.
Маълум қилинишича, Бош прокуратура ҳузуридаги Департаментнинг Қўрғонтепа туман бўлими томонидан терговга қадар текширув ўтказилган. Текширувда тумандаги деҳқон бозорининг моддий жавобгар шахслари МЧЖнинг 201,7 миллион сўмини ҳеч қандай асоссиз иш ҳақи ва рағбатлантириш сифатида олгани аниқланган. Шунингдек, улар савдо ҳамда хизмат кўрсатишдан тушган 157 миллион сўмни кирим қилмасдан, жами 358,7 миллион сўм пул маблағларини талон-торож қилган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 207-моддаси (мансабга совуққонлик билан қараш) билан жиноят иши қўзғатилиб, тергов ҳаракатлари ўтказилмоқда.
Аввалроқ Ўзбекистондаги иккита ОТМ бухгалтерлари 22,5 миллиард сўмни ўзлаштиргани, Ўзбекистон Экология қўмитаси ва унинг таркибидаги ташкилотлар 9,4 миллиард сўмлик маблағни ноқонуний сарфлагани, Ўзбекистонда бешта вазирлик 61 миллиард сўмни талон-торож қилишининг олди олингани тўғрисида хабар берилганди.
Изоҳ (0)