O‘zbekiston xalq o‘qituvchisi, “Qorako‘l maktabi” asoschisi To‘xtamurod Jumayev vafot etdi

O‘zbekiston Xalq o‘qituvchisi To‘xtamurod Jumayev 76 yoshida vafot etdi. Bu haqda Xalq ta’limi vazirligi matbuot xizmati xabar berdi.

To‘xtamurod Jumayev 1945-yilda Buxoro viloyati Olot tumanida tug‘ilgan. 1967-yilda Buxoro pedagogika institutini tugatgan. 1963-yildan Olot tumanidagi 3-maktab, so‘ng Qorako‘l tumanidagi 8-maktabda matematika fani o‘qituvchisi, maktab direktori o‘rinbosari, 1990−2015-yillarda Qorako‘l tumanidagi 1-ixtisoslashtirilgan iqtidorli bolalar maktab-internati direktori vazifasida ishlagan.

U tashkil qilgan Qorako‘l maktabida o‘ziga xos ta’lim olish tizimi joriy qilingan. Prezident Shavkat Mirziyoyev 2020-yil sentabr oyida O‘qituvchi va murabbiylar kuniga bag‘ishlangan marosimdagi nutqida To‘xtamurod Jumayevning xizmatlarini e’tirof etgandi.

“Bu ajoyib pedagog o‘zining tinimsiz izlanishi, yangi ta’lim metodikasi bilan oddiy bir qishloq maktabini respublika darajasidagi mashhur ta’lim dargohiga aylantirdi. Holbuki, ushbu maktab Buxoroning olis cho‘l tumanida joylashgan bo‘lib, zamonaviy sharoitga, qulay imkoniyatlarga ham ega emas edi.

Bugun ushbu maktab bitiruvchilarining 95 foizdan ortig‘i oliy o‘quv yurtlariga o‘qishga kiryapti. Xalqaro olimpiadalardan eng ko‘p medal olib kelayotganlar ham aynan shu maktabning o‘quvchilari hisoblanadi. Mamlakatimizning barcha hududlaridan, hatto poytaxt Toshkentdan ham odamlar o‘z farzandini Qorako‘lga olib borib, ana shu maktabga o‘qishga beryapti. Biz bu ta’lim maskani erishayotgan katta yutuqlarni inobatga olib, o‘tgan yili uni Xalqaro matematika maktabiga aylantirdik.

To‘xtamurod domla ham jadid bobolarimiz kabi tinimsiz va fidokorona mehnat qilib, hozirgi davrning yangi usul maktabini yaratishga erishdi. Mana, bugungi kunimizning haqiqiy ma’rifatparvari, davrimizning Avloniysi, Behbudiy domlasi, Munavvarqorisi”, — degan edi Prezident.

“O‘zbekiston Respublikasi xalq o‘qituvchisi”, “El-yurt hurmati” ordeni va “Buyuk xizmatlari uchun” ordeni sohibi To‘xtamurod Jumayev murabbiy-metodist sifatida “O‘quvchilar bilimidagi bo‘shliqlarni aniqlash va ularni bartaraf etish usullari”, “Zamonaviy darsni tashkil etish yo‘llari”, “Maktabda ichki nazoratni tashkil qilish” singari 7 ta metodik qo‘llanmasi chop ettirgan.