Андижон вилоятида COVID-19 беморларини даволашга мўлжалланган марказларда коронавирусга чалинган ҳамда касалликда гумон қилинган 1061 нафар бемор даволанмоқда. Бу ҳақда «Дарё» мухбири Умиджон Мамарасулов хабар берди.
Андижон вилоят соғлиқни сақлаш бошқармаси ахборот хизмати ходими Муфаззалшо Муҳаммадиевнинг маълум қилишича, коронавирусга чалинган беморларни даволаш учун биринчи босқичда тўртта — вилоят юқумли касалликлар шифохонаси, Андижон шаҳар марказий шифохонаси, наркология диспансери ҳамда қиличбозлик спорт мажмуасида жами 1180 ўринли касалланганларни саралаш ва тақсимлаш маркази фаолият юритмоқда. Шунингдек, вилоят ҳокимлиги ташаббуси билан иккинчи босқич учун яна бешта ҳудудда 1500 та захира ўрин тайёрлаб қўйилган.«Вилоят штаби томонидан тақдим этилган рақамлар таҳлил қилинганда, шу кунларда бир сутка давомида ўртача тез тиббий ёрдам хизматига жами 4500 та чақирув бўлган. Вилоят бўйича 11 та лабораторияда бир кунда ПЦР аппаратлари орқали ўртача 4000 га яқин таҳлиллар ўтказилмоқда. Натижада кун давомида ўртача 30—40 нафар фуқарода мусбат натижалар аниқланмоқда. Уларнинг клиник белгиларига қараб шифохонада ёки уй шароитида даволаниши тавсия этилмоқда. Бугунги кунда — 2021 йилнинг 14 июль ҳолатига кўра, даволаш марказларида 1061 нафар бемор даволанмоқда. Шундан 36 нафарини ҳомиладор аёллар, 82 нафарини эса 18 ёшгача бўлган болалар ташкил этади», — дейди Муфаззалшо Муҳаммадиев.
Қўшимча қилинишича, вилоят ҳокимлиги томонидан коронавирус инфекцияси билан касалланган беморларга сифатли тиббий хизмат ташкил этиш мақсадида тиббиёт муассасаларида 49 турдаги 3 миллиард сўмлик ҳамда «Макро-фарм» МЧЖ омборхонасида 24 миллиард сўмлик фақат COVID’ни даволашга ишлатиладиган дори-дармон ва тиббий жиҳозлар захираси яратилган.
Изоҳ (0)