Toshkentdagi Amir Temur xiyobonida rossiyalik blogerni ko‘rish uchun yuzlab fuqarolar to‘plangani haqida xabar berilgandi. Ushbu holat yuzasidan O‘zbekiston Sog‘liqni saqlash vazirligi o‘z munosabatini bildirdi.
O‘zbekistonda koronavirus infeksiyasi tarqalishining oldini olish bo‘yicha Respublika maxsus komissiyasi tomonidan mavjud epidemiologik vaziyat tufayli mamlakatda barcha turdagi ommaviy bayram tadbirlari, sport musobaqalari, shuningdek, konsert, festival, teatr va kino dasturlari vaqtincha to‘xtatilishi belgilangan.
Bundan tashqari, 50 nafardan ko‘p bo‘lgan kishilar bir joyda bir vaqtning o‘zida to‘planmasligi tavsiya etilmoqda.
1-avgustdan boshlab esa to‘yxonalarda oilaviy tantana, to‘y, ma’raka va marosimlarni faqatgina 50 kishidan ko‘p bo‘lmagan hamda sanitariya va gigiyena talablariga qat’iy rioya etgan holda o‘tkazishga ruxsat berilgan.
“Ushbu chora-tadbirlarning barchasi yagona maqsad — aholi salomatligini asrashga qaratilgan. Biroq shunga qaramay, ayrim hollarda karantin qoidalari va cheklovlari qo‘pol ravishda buzilayotgan holatlar ham kuzatilmoqda.
Xususan, 13-iyul kuni Toshkentdagi Amir Temur xiyobonida Instagram va YouTube ijtimoiy tarmoqlarida Subo nomi bilan tanilgan rossiyalik bloger S.Mamedovni kutib olish uchun 150–200 nafarga yaqin yoshlar yig‘ilgan. Ijtimoiy tarmoqlar va internet saytlarida tarqalgan ushbu tadbir aks etgan videotasvirlardan ko‘rish mumkinki, bu yig‘inda ishtirok etgan yoshlar tomonidan mamlakatimizda o‘rnatilgan ijtimoiy masofa saqlash, niqob taqish kabi karantin qoidalariga mutlaqo rioya etilmagan.
Aytish kerakki, bu holat koronavirus infeksiyasining yanada keng tarqalishi va epidemiologik vaziyat yanada og‘irlashishiga olib kelishi mumkin. Kasallikning yangi shtammlari tez yuqishi, jadal rivojlanishi hamda yashirin ravishda organizmni kuchli jarohatlashi kuzatilmoqda. Inson o‘z organizmida kechayotgan jarayonni bilmay qolishi ham mumkin.
Shu bois barcha fuqarolardan karantin qoidalari va cheklovlari, sanitariya va gigiyena talablariga qat’iy rioya etishga, ommaviy to‘planmaslikka chaqiramiz. Ota-onalar o‘z farzandlariga bu borada tegishli tushuntirish berishlari, ko‘pchilik to‘planadigan joylardan uzoq bo‘lishlariga e’tibor qaratishlarini so‘raymiz”, – deyiladi vazirlik xabarida.
Qayd etilishicha, O‘zbekiston Ma’muriy javobgarlik to‘g‘risidagi kodeksiga muvofiq, epidemiyalarga qarshi kurashish qoidalarini buzish tegishli tartibda javobgarlikka tortishga sabab bo‘ladi.
Bundan avval Toshkentning 11 ta tumanida COVID-19 bemorlari uchun maxsus poliklinikalar tashkil etilgani, O‘zbekistonda korxona va tashkilotlar xodimlari COVID-19 qarshi ommaviy, lekin ixtiyoriy emlanayotgani hamda O‘zbekistonda karantin cheklovlari bekor qilingani haqidagi xabarlar rad etilgani haqida xabar berilgandi.
Izoh (0)