Қашқадарёда вилоят Мактабгача таълим бошқармаси бошлиғи Асрор Алимардоновга 6 минг доллар пора бериб ишга кирганини айтган боғча мудираси жиноий жавобгарликка тортилиши мумкин. Бу ҳақда Қарши шаҳридаги Журналистлар уйида бўлиб ўтган матбуот анжуманида маълум қилинди, дея хабар берди «Дарё» мухбири.
Таъкидланишича, вилоят Мактабгача таълим бошқармаси бошлиғи Асрор Алимардонов вилоятда фаолият юритувчи журналист ва блогерлар билан мулоқотда тизимда бўлаётган адолатсизликларни очишда босимга учраётганини, баъзан туҳматга дуч келаётганини маълум қилган.
Бошқарма бошлиғининг қайд этишича, 2020 йил январь ойида Чироқчи туманида Жанубий Корея услуби асосида 7 миллиард сўмга қурилган янги боғча фойдаланишга топширилгач, бошқарма бошлиғи сифатида мудира тайинлаб, жамоани ҳам ўзи шакллантириб берган.
«Аммо мудира бошқарма мутахассислари томонидан шакллантирилган жамоани ишга олмай, ўзининг таниш-билишларини, хусусан, қариндошларини ишга олгани учун шикоят тушди. Бунга жавобан ҳолатни вазирлик мутахассислари ўрганди. Дастлабки ўрганишдан сўнг мудира огоҳлантирилди. Ҳолат яна такрорлангач, вазиятни қайта ўргандик ва мудирага у билан тузилган шартномани бекор қилишимизни айтдик. Шунда мудиранинг опасими ёки синглисимиди ёнимга келиб, ‘Биз сизни ишга олиш учун пул олган’, дея айблаймиз дейишди. ‘Асосингиз бўлса, исботлаб беролсангиз айтинг’, дедим. Хуллас, бир оз ўтиб, интернетда боғча мудираси менга 6 минг доллар бериб ишга кирганини айтиб чиқди. Бир кун ўтгач эса мудира бу гапни жаҳл устида айтганини билдириб, узр ҳам сўраб чиқди», — дейди бошқарма бошлиғи Асрор Алимардонов.
Бошқарма бошлиғининг қўшимча қилишича, унга пора бериб ишга кирганини айтган боғча мудираси бўшатилиши ҳақидаги воқеадан сўнг таниш-билишларини олиб, бошқарма бошлиғининг яшаш уйига ҳам борган ва унга дўқ-пўписа қилган.
«Бунинг учун 18-боғча мудираси маъмурий жавобгарликка ҳам тортилди. Пул бериб ишга кирганман деган гапи учун энди жиноий жавобгарликка ҳам тортилиши мумкин. Айни пайтда бу иш бўйича тергов жараёнлари якунланиб, иш судга чиқди. Эндиликда мудиранинг аввалига пул бердим деб, мени обрўсизлантириб, кейин бу гапларни жаҳл устида айтгандим, деган гапларига суд ҳуқуқий баҳо беради», — деди бошқарма бошлиғи.
Матбуот анжуманида айтилишича, вилоятда мактабгача таълим тизимидаги жирканч иллатларни бартараф этиш мақсадида бошқарма томонидан кўплаб ишлар амалга оширилмоқда.
«Шу йилнинг ўзида бошқарма бошлиғи ташаббуси ва саъй-ҳаракати билан болалар ҳақига хиёнат қилаётган 16 нафар мудира ишдан олинди. Ноқонуний ҳолатларга қарши муросасиз курашилмоқда. Айрим ҳолларда, жумладан, Чироқчидаги ҳолатларда ўз лавозими, мансаби учун иғво тарқатиш, туҳмат қилиш ҳолатлари ҳам учраб турибди. Бу каби туҳмат ва асосланмаган маълумотлар бошқарма масъулларининг обрўсига таъсир кўрсатиши мумкин», — дейди бошқарма ахборот хизмати раҳбари Баҳодир Мусаев.
Матбуот анжуманида таъкидланишича, айни кунда вилоятда 1954 та мактабгача таълим ташкилоти бўлиб, вилоятда мактабгача ёшдаги болаларнинг муассасаларга қамраб олиниши 48 фоизга етган.
Изоҳ (0)