Голливуд юлдузи Мэтт Деймон Канн кинофестивали давомида журналистлар билан бўлиб ўтган суҳбат жараёнида Жеймс Кэмероннинг «Аватар» номли «кичикроқ фильми»да бош ролни ўйнаш таклифини қандай рад этганини сўзлаб берди, деб ёзади Esquire.
Кэмерон Деймонга касса йиғимларининг 10 фоизини таклиф қилган, бироқ актёр ўша вақтда «Жейсон Борн» фильмида суратга тушаётгани сабаб режиссёрга рад жавобини берган.
Вақт ўтгач, актёр жаҳон кинематография тарихидаги энг йирик шартномадан воз кечгани маълум бўлди, чунки «Аватар» прокатда 2,7 миллиард доллардан ортиқ маблағ тўплаган.
«Мен тарихга кираман. Сиз ҳеч қачон бу каби катта пулни рад этган актёрни учратмайсиз», — дейди Деймон. Унинг сўзларига кўра, у Борн ҳақидаги франшизани тарк этмаслик бўйича ‘ахлоқий қарор’ қабул қилган. Мэттнинг қўшимча қилишича, бу ҳақида у биринчи бор дўсти, актёр Жон Красинскига айтган. Деймоннинг таъкидлашича, унинг ҳамкасби ва дўсти бундан шокка тушган, ҳатто столдан туриб кетган.
«Албатта, ‘Аватар’да ўйнаганингда ҳам ҳаётингда ҳеч нарса ўзгармаган бўларди. Фақат ҳозир иккимиз космосда гаплашиб ўтирган бўлардик», — дея ҳазиллашган Красински.
Натижада Кэмерон бош ролга актёр Сэм Уорингтонни танлаган. Deadline нашрининг ёзишича, у қадар машҳур бўлмаган актёрга касса йиғимларининг ўндан бир қисми таклиф этилмаган бўлса керак.
Айни вақтда Жеймс Кэмерон «Аватар» тарихининг давомига айланиши керак бўлган тўртта янги фильм устида иш олиб бормоқда. «Аватар 2»нинг премьераси 2022 йилнинг декабрига режалаштирилган. Унда Сигурни Уивер, Сэм Уорингтон, Зои Салдана, Кейт Уинслет ва Жоэл Дэвид Мур роль ижро этади.
«Аватар 3» 2024 йилнинг декабрида экран юзини кўрса, «Аватар 4» — 2026 йилнинг декабрида, «Аватар 5» эса 2028 йилнинг декабрида тақдим этилади.
Изоҳ (0)