10-iyul holatiga ko‘ra, Qozog‘istonda o‘tgan bir kecha-kunduzda 3695 kishida koronavirus infeksiyasi aniqlandi, deya xabar bermoqda Tengrinews COVID-19 tarqalishiga yo‘l qo‘ymaslik bo‘yicha idoralararo komissiya ma’lumotlariga tayanib.
Bu respublikada pandemiya boshidan buyon qayd etilgan eng yuqori sutkalik ko‘rsatkichdir. Bundan avvalgi rekord 9-iyulda kuzatilgan, o‘shanda 3130 kishida virus tasdiqlangan edi.
Mamlakatda koronavirus yuqtirib olish bo‘yicha jami 454 825 ta holat qayd etilgan. Shularning 412 007 nafari sog‘aygan. O‘tgan bir kecha-kunduzda esa 1857 kishi COVID-19’ni yengishga muvaffaq bo‘lgan.
Bu orada Qozog‘istondagi yana bir hudud — Ko‘stanay viloyati koronavirus bilan bog‘liq vaziyat og‘ir bo‘lgan “qizil” zonaga kiritildi. Bu zonada Nur-Sulton, Olmaota, Chimkent shaharlari hamda Aqmola, Aqto‘be, Atirau, G‘arbiy Qozog‘iston, Qarag‘anda, Mang‘istov va Pavlodar viloyatlari ham bo‘lib turibdi.
Eslatib o‘tamiz, Qozog‘iston poytaxti Nur-Sulton shahrida COVID-19 bilan bog‘liq vaziyat tufayli 2-iyuldan karantin choralari yanada kuchaytirildi. Yangi cheklovlarga ko‘ra, Nur-Sultonda madaniy tadbirlarni yopiq joylarda o‘tkazish taqiqlandi, onlayn tashkil etish bundan mustasno. Shuningdek, park hududida joylashgan barcha turdagi ochiq attraksionlar ishlamaydigan bo‘ldi.
Izoh (0)