Gaiti prezidenti o‘ldirilishi oldidan qiynoqqa solingani ma’lum bo‘ldi. AQSh siyosiy inqirozni tartibga solish uchun Gaitiga o‘z delegatsiyasini yuboradi

Gaiti prezidenti Jovenel Moizga hujum qilganlar uni o‘ldirishdan avval qiynoqqa solgan. Bu haqda mamlakat bosh vaziri vazifasini bajaruvchi Klod Jozef ABC News kanaliga bergan intervyusida ma’lum qildi, deb yozadi Meduza.

“Yollanma askarlar prezident qarorgohiga kelib, uni qiynagan va o‘ldirgan”, — dedi Jozef va hujumning 20 ga yaqin ishtirokchisi qo‘lga olinganini, endi ular javobgarlikka tortilishini qo‘shimcha qildi. “Adolatga erishishimizga qattiq ishonamiz”, — dedi u Gaiti hukumati qotillikning fosh qilinishini o‘zining birlamchi vazifasi deb hisoblashini qo‘shib qo‘ydi.

10-iyul kuni Moizning bevasiga tegishli rasmiy Twitter’da prezidentning o‘limidan keyingi birinchi audioxabar paydo bo‘ldi. Haiti24’ning yozishicha, Martin Moiz uning turmush o‘rtog‘i loyihalari amalga oshirilishiga yo‘l qo‘ymaslik maqsadida yollanma qotillar tomonidan o‘ldirilgan. Shu bilan birga, bevaning so‘zlariga ko‘ra, prezidentning qotillari “uning birorta so‘z ham aytishiga yo‘l qo‘ymagan”. Jozef BC News’ga bergan intervyusida Martin Moizning audiomurojaati haqiqiy ekanini tasdiqladi.

Ayni paytda Gaitining mahalliy Juno7 nashri xabariga ko‘ra, prezidentning o‘ldirilishi fonida yuzaga kelgan siyosiy inqirozni tartibga solish uchun AQSh Gaitiga o‘zining katta delegatsiyasini yuboradi.

Delegatsiya ishtirokchilari orasida prezidentning g‘arbiy yarimshar bo‘yicha maxsus yordamchisi Xuan Gonsales va davlat kotibining g‘arbiy yarimshar masalalari bo‘yicha yordamchisi vazifasini bajaruvchi Laura Loxman bor. Ular bosh vazir vazifasini bajaruvchi Klod Jozef, o‘zini bosh vazir deb hisoblovchi Ariel Genri hamda senat tomonidan muvaqqat prezident deb e’lon qilingan Jozef Lamber bilan uchrashadi.

Jovenel Moiz Gaiti poytaxti Port-o-Prensdagi qarorgohida 7-iyulga o‘tar kechasi o‘ldirildi. Uning rafiqasi o‘qotar quroldan yaralanib, dastlab mahalliy kasalxonaga yetkazildi, so‘ng davolanish uchun AQShga yuborildi.

Gaiti hukumati prezidentni o‘ldirishda gumonlanib, 15 nafar kolumbiyalik va ikki nafar amerikalik qo‘lga olinganini ma’lum qildi. Yana ikki gumonlanuvchi (ular ham Kolumbiya fuqarolari) politsiyachilar bilan otishmada o‘ldirildi. Suiqasdning ishtirokchilari deb taxmin etilayotgan yana bir necha kishi qochib ketishga muvaffaq bo‘ldi.

Prezidentning o‘ldirilishi munosabati bilan Gaiti hukumati AQShga murojaat qilib, mamlakatga infratuzilmaning juda muhim obyektlarini himoya qilish uchun cheklangan qo‘shinlar kontingentini yuborishni so‘radi.