Qashqadaryo viloyatining Shahrisabz shahrida 2021-yilning 13—15-iyun kunlari bo‘lib o‘tgan yoshlar festivalida katta ekranning uch kunlik ijarasiga 440 million so‘m sarflangani ma’lum bo‘ldi. Bu haqda Davlat xaridlari bo‘yicha maxsus axborot portaliga tayanib, “Qashqadaryo” gazetasi xabar bermoqda.
“Festival doirasida birgina zar sepadigan moslamaga 15 million so‘m, 100 dona 50 metrlik girlyandalar uchun esa 21,5 million so‘m sarflangan. Ammo eng qimmati — festival bo‘lib o‘tgan joyda o‘rnatilgan 150 kvadrat metrlik LED ekran ijarasidir. Uning uch kun davomida ishlatilishi viloyat budjetiga 440 million so‘mga tushgan”, — deyiladi nashrning bu haqdagi maqolasida.
Qayd etilishicha, 2021-yilning 13—15-iyun kunlari o‘tkazilgan Shahrisabz shahridagi “Yangi O‘zbekiston yoshlari, birlashaylik!” shiori ostidagi festival uchun viloyat mahalliy budjetining zaxira jamg‘arma mablag‘lari hisobidan 1 milliard 517 million 800 ming so‘m ajratilgan.
Viloyat nashri bir yil davomida muhim ijtimoiy ahamiyatga molik loyihalarni amalga oshirish uchun viloyatdagi nodavlat notijorat tashkilotlari va fuqarolik jamiyatining boshqa institutlariga eng ko‘pi bilan 30 million so‘mdan grant berilishini yozib, yoshlar festivalidagi LED ekranning uch kunlik ijarasi taxminan 15 ta NNTning grantiga tengligini hisob-kitob qiladi.
“Yana bir qiziq, ammo tushunish ancha qiyin bo‘lgan tomoni shundan iboratki, Shahrisabz shahrida 13—15-iyunda bo‘lib o‘tgan festivalni boshqarish va tashkil etish uchun xizmat ko‘rsatuvchi korxonani tanlash 24-iyunda amalga oshirilgan. 2021-yil 24-iyundagi tanlov bayoniga ko‘ra, shu kuni viloyat hokimligining bir qator mas’ul xodimlari ‘Zamin STV’ xususiy korxonasi, ‘Chortoq star media’ MCHJ va ‘Zamin nur media’ MCHJ tomonidan taqdim etilgan tijorat takliflarni o‘rganib chiqishdi va narxi arzonligi va sifati yaxshiligini e’tiborga olib, ‘Zamin STV’ XK xizmatlarini tanlashdi.
Bu bayonni ko‘rib, kulishingni ham, yig‘lashingni ham bilmaysan kishi. Nahotki, 24-iyunda tanlov o‘tkazgan va uning bayoniga imzo chekkan mas’ul shaxslar yoshlar festivali taxminan 10 kun oldin yakunlanganini bilishmagan bo‘lsa? Bilishsa, nega tanlovni festivaldan oldin emas, ancha keyin o‘tkazishdi? Yoki hammasiga hokimning qarori kech (21-iyunda) chiqarilgani sabab bo‘ldimi?”, — deya savol beradi maqola muallifi.
Viloyat hokimligi nashridagi maqola “Katta dabdaba bilan to‘y qilayotgan odamlarni ortiqcha sarf-xarajatdan qaytarishga urinsangiz, ular ‘Biz orzu-havas qilganmiz, birinchi navbatda yoshlar baxtini o‘ylaymiz’ deya rad qilishadi, ammo aslida kimgadir o‘zining kuch-qudrati, salohiyati va imkoniyatlarini ko‘z-ko‘z qilishni mo‘ljallashadi. Shu ma’noda ularning Shahrisabzdagi yoshlar festivali tashkilotchilari bilan o‘xshashligi bor, chamamizda. Birgina farqi, to‘y qilayotganlar o‘z cho‘ntagidan pul sarflaydi...”, degan mulohaza bilan yakunlanadi.
Izoh (0)