Buxoro viloyatidagi Olot chegara bojxona postida bir paytning o‘zida ikki holatda hujjatlarda ko‘rsatilmagan salkam 701 million so‘mlik noqonuniy tovarlar olib kirilishiga chek qo‘yildi. Bu haqda “Daryo”ga viloyat bojxona boshqarmasi axborot xizmati rahbari Javohir Ismoilov xabar berdi.
Ta’kidlanishicha, 2021-yilning 5-iyul kuni viloyat Bojxona boshqarmasi Olot chegara bojxona posti xodimlari qo‘shni davlatdan kirib kelgan yuk avtomashinasini belgilangan tartibda bojxona nazoratidan o‘tkazgan. Bunda bojxona ko‘rigi davomida yuk kuzatuv hujjatlarida ko‘rsatilmagan, qiymati salkam 439 million so‘m bo‘lgan metallashtirilgan tovarlar borligi aniqlangan.Xuddi shu paytning o‘zida mazkur postga kirib kelgan keyingi yuk avtomashinasi ham belgilangan nazoratdan o‘tkazilganda unda ham noqonuniy ravishda ortilgan ortiqcha yuklar borligi aniqlangan. Unga ko‘ra, umumiy qiymati 262 million so‘mlik jami 63 nomdagi 1161 dona avto ehtiyot qismlar yuk kuzatuv hujjatlarida ko‘rsatilmagan bo‘lgan.
“Chegara bojxona postlarida chap berib o‘tish maqsadini ko‘zlaganlar xato qilishadi. Har bir noqonuniy xatti-harakatga yarasha jazo choralari mavjud. Bir paytning o‘zida sodir bo‘lgan har ikki holatda salkam 701 million so‘mlik ortiqcha va yashirin yuklangan tovarlarning olib kirilishiga chek qo‘yildi. Hozirda mazkur holatlar yuzasidan surishtiruv ishlari davom ettirilmoqda”, — deydi Javohir Ismoilov.
Izoh (0)