Serqirra va mehnatkash futbolchi, ikkala oyog‘ida ham raqiblariga xavf tug‘dira oladigan Son Hyon Min 8-iyul kuni 29 yoshni qarshi oldi. U ortiqcha harakat qilmaydi — hech qanday tushunarsiz fint, u “publikaga o‘ynamaydi”. Koreyalik iqtidor egasi har bir o‘yinda bu xuddi uning uchun oxirgisidek harakat qiladi.
“Tottenhem” afsonasi Gari Mabbut shunday degan edi: “Menimcha, u so‘nggi bir necha mavsumda jamoaning o‘yiniga eng ko‘p ta’sir o‘tkazgan futbolchi”.
O‘zining vatanida Son Hyon Min qahramon hisoblanadi. Janubiy Koreyada har bir qadamda uning ishtirokidagi reklamalarga ko‘zingiz tushadi — teri parvarishi uchun mahsulotlar, turli energetik ichimliklar, oziq-ovqat mahsulotlari, hatto muzqaymoq reklamalari. U har joyda.
U Pak Ji Sunni ortda qoldirgan holda Premyer Liga tarixidagi eng yaxshi koreyalik to‘purarga aylandi. Shuningdek, Yevropa Chempionlar Ligasida gol urish bo‘yicha Maksim Shatskixning rekordini yangilab, YChLning osiyolik eng yaxshi to‘purariga aylangandi. Uni ikkilanmay, Angliyada to‘p surayotgan yulduz futbolchi, o‘z vatanining esa qahramoni deyish mumkin. Biroq barcha narsaning o‘z ibtidosi bor.
Mashhurlikka qo‘yilgan ilk qadamlar
“Tottenhem” klubi va Janubiy Koreya terma jamoasi hujumchisining faoliyat yo‘li Germaniyadan boshlangandi. 16 yoshida u “Gamburg”ga o‘tish uchun maktabni tashlaydi. O‘z orzusi yo‘lida dunyoning narigi chekkasiga borish uchun o‘smirga katta iroda kerak bo‘lgandi. Uning Yevropadagi ilk murabbiyi Markus fon Alen bo‘lgandi. Alen Songa “Gamburg”ning yoshlar jamoasida ustozlik qilardi.
U juda tezkor edi, ko‘p gol urar va jamoa bilan ishlashga tayyor edi. U doim otasi bilan bo‘lardi va bo‘sh qolgan har daqiqasini mashg‘ulotlarga sarflardi. U har kuni ishlardi.Son futbolchilik faoliyatiga otasi katta ta’sir o‘tkazganini juda ko‘p ta’kidlagan. Son Un Chon (Son Hyon Minning otasi) ham professional futbolchi bo‘lgan, biroq jarohat sabab 1990-yilda faoliyatini yakunlagan. Son Hyon Min bitta uslubni to‘liq o‘zlashtirgunga qadar o‘shaning ustida tinmay ishlayveradi va boshqasiga o‘tmaydi. Bunga uni otasi o‘rgatgan.Markus fon Alen, murabbiy
Futbolchi Son Un Chon o‘ylab topgan jazo turlarini yodga oladi: “10 yoki 12 yoshligimda otam maktabdagi jamoamni shug‘ullantirishga kelgandi. Mashg‘ulot shartiga ko‘ra, to‘pni 40 daqiqa davomida havoda saqlab turish kerak edi. Kimdir to‘pni tushirib yuborsa, otam hech narsa demasdi, biroq bunga mening haqqim yo‘q edi, otam hammamizni boshidan boshlashga majbur qilardi”.
Son Un Chonning o‘zi ham farzandlarini qattiqqo‘llik bilan tarbiyalaganini va ayrim vaqtlar kaltaklaganini tan olgandi. Bundan tashqari ota o‘g‘illariga darvoza tomon zarba berish va uzatmalarni mashq qilishga ruxsat bermasdi, shuningdek, ular 14 yoshga to‘lmagunga qadar futbol o‘ynashga ijozat bermagan. Son Un Chon bu yigitlarning potensialini sindiradi, degan fikrda: “Yoshlikda g‘alabaga o‘chlik ortiqcha bosimga sabab bo‘ladi. Bu ularning faoliyatini buzib yuboradi. Bu yana ko‘plab futbolchilarning yosh o‘tgandan keyin jarohatlar asoratidan qiynalishiga ham sabab bo‘ladi”. U mashg‘ulotlar vaqtidagi o‘yinlarga ruxsat bermasdi.
2010-yilda Son Hyon Min “Gamburg”ning asosiy jamoasida debyut qildi. Keyinchalik u bilan professional shartnoma imzolandi. Shunday yoqimli onlarni “Chelsi”ga qarshi o‘rtoqlik o‘yinidagi og‘ir jarohat bir pul qildi. Futbolchi bir necha oyga safdan chiqdi. Biroq 2010-yilning oktabrida Bundesligadagi debyutini o‘tkazdi va 24-daqiqada “Kyoln” darvozasini ishg‘ol qilib, debyut golini urdi. Bu orqali Son klub tarixidagi eng yosh gol muallifiga aylandi.
“U yosh, aqlli va 18 yoshida Bundesligada muhim vazifani bajarmoqda”, — deya aytgandi uning jamoadoshi Rud van Nistelroy. Dastlabki mavsumdagi 13 o‘yinda Son uchta gol urdi. 2010-yilning noyabrida “Gamburg” hujumchi bilan kelishuv shartlarini yaxshilab, yangi bitim imzoladi.
Son endigina 19 yoshda edi, u asosiy jamoada harakat qilayotganiga bir yil ham bo‘lmagandi, katta futboldagi ikkinchi mavsumida esa yana jarohat oldi va formasini yo‘qotdi. Biroq mavsum oxirida yana yorqin o‘ynadi va “Gannover”ga urgan goli orqali “Gamburg”ni quyi ligaga tushib ketishdan saqlab qoldi.
“Dinozavrlar” safidagi so‘nggi, uchinchi mavsumida Son Hyon Min 12 ta gol urdi va ikkita golli uzatma amalga oshirdi. Uning jamoasi Yurgen Klopp “Borussiya”sining 31 o‘yindan iborat mag‘lubiyatsiz seriyasiga nuqta qo‘ydi (“Gamburg” o‘z uyida 3:2 hisobida g‘alaba qozongandi). “Gamburg” dortmundliklarga qarshi ikkinchi o‘yinda ham g‘alaba qozonadi — 4:1. Ikkala o‘yinda ham koreyalik futbolchi dublni rasmiylashtirgandi.
Shundan keyin futbolchining faoliyatida yangi bosqich boshlandi. Unga Chempionlar Ligasiga yo‘l olgan “Bayer” taklif bilan chiqdi. 2013-yilning yozida leverkuzenliklar Son Hyon Min transferi uchun 10 million yevro to‘laydi. Son koreyalik afsonaviy futbolchi Cha Bom Ginning yo‘lidan ketgandi. Solishtirishlardan qochishning iloji yo‘q edi. Bundan tashqari afsonaviy futbolchi ikki karra UEFA Kubogi sohibi bo‘lgandi — avvaliga “Ayntraxt”da, keyinchalik “Bayer” safida.
Bir oydan keyin Janubiy Koreyaning LG Electronics kompaniyasi “Bayer” bilan homiylik shartnomasini imzoladi. Unga ko‘ra futbolchi brendning elchisi bo‘lishi kerak edi.
Avvaliga Son katta bosim bilan harakat qiladi, biroq noyabr oyida sobiq jamoasiga qarshi kechgan o‘yinda het-trik qayd etadi, “Bayer” esa 5:3 hisobidagi g‘alabani qo‘lga kiritadi.
Ikki mavsum davomida tarkibida koreyalik futbolchi bo‘lgan “Bayer” muntazam mamlakatning top-4 jamoalari qatoridan joy oldi. 2014/15-yilgi mavsumda Son “dorixonachilar” safida Chempionlar Ligasida beshta gol urdi va uning jamoasini faqat Madridning “Atletiko”si to‘xtatib qoldi.
Maurisio Pochettino futbolchini anchadan beri kuzatar va “Sauthempton”da ishlab yurgan vaqtlaridayoq uni o‘z jamoasida ko‘rishni xohlardi, biroq bu ishni London klubi amalga oshirish nasib etdi. “Tottenhem” 2015-yilning avgustida 22 million funt evaziga transferni amalga oshirdi. Son Hyon Min futbol tarixidagi eng qimmat osiyolik futbolchiga aylandi.
Angliya, yangi chorlov
Uning faoliyatida yana bir yangi sahifa ochilgandi. Biroq u rasvo boshlandi. Buning uchun o‘sha mavsumdagi so‘nggi tur o‘yinini eslash kifoya. “Nyukasl”ga qarshi bahsda londonliklar 1:5 hisobida yutqazadi va butun jamoa yomon o‘ynaydi. Biroq hatto ular ichida ham Sonning rasvo o‘yini ajralib turardi. Shunchalik yomon ediki, u tanaffus vaqtida zaxiraga olinib, o‘rniga yosh futbolchi maydonga tushiriladi. Bu almashtirish uning Angliyadagi faoliyatiga nuqta qo‘yishi ham mumkin edi. Yozdayoq Son “Bayer”ga qaytib ketishni istaydi.
22 yoshli Son iqtidorli futbolchi sifatida e’tirof etilardi, biroq unga ko‘p narsa yetishmasdi. U o‘zi uchun harakat qilar, ba’zida bu chiroyli ko‘rinardi, biroq ko‘pincha jamoaga zarar keltirardi. Katta jamoalarga qarshi o‘yinlarda himoyaviy o‘yindagi kamchiliklari ko‘rinib qolardi, futbolchining o‘zi esa to‘p va javobgarlikdan qochardi.
Angliya futboliga moslashish zarur edi. U shunchaki Osiyo bozoriga chiqish uchun emas, balki “Tottenhem”ning kelajakdagi muhim futbolchilaridan biriga aylanishini maqsad qilib olib kelingandi. Biroq Son Hyon Minda yana bir muammo bor edi. Uning yelkasida butun Koreya va Osiyoning javobgarligi yotardi. U Janubiy Koreyaning nafaqat eng yaxshi sportchisi, balki eng muhim shaxslaridan biri. Bunga amin bo‘lish uchun Robbi Kruzning “Bayer”ning Osiyo bo‘ylab turnesi haqidagi so‘zlarini eslash kifoya: “Biz savdo markaziga borgandik, u yerda 30 mingdan ortiq odam bor edi va hammasi uni kutardi. Unga haqiqatda og‘ir. Bizda, Avstraliyada unday emas, bu qadar katta bosimni his qilmaymiz”.
“Men ketishga juda yaqin kelgandim. Menejerning xonasiga bordim va bu yerda o‘zimni qulay his qilmayotganimni aytdim. Germaniyaning qaytgim kelardi. “Tottenhem”da qolganimdan juda xursandman”, — degandi Son Hyon Min.
Hammasi 2016-yilgi Rio Olimpiadasidan keyin o‘zgardi. Endi Son sheriklari bilan til topishib olgan, to‘pdan qo‘rqmas va o‘yinni o‘ziga olishga urinardi. Ahmoqona xatolar va o‘ylanmay qilingan harakatlar deyarli yo‘qolgandi. Bu butkul boshqa Son edi.
Bunga sabab bor — Maurisio Pochettino qo‘l ostidagi mavsumoldi tayyorgarlik jarayoni. Futbolchi “Bayer”dan sotib olinganda avgustning oxiri edi, Premyer Liga allaqachon boshlanib bo‘lgandi. Pochettino — aqlbovar qilmas darajada qattiqqo‘l mutaxassis va uning jamoasiga moslashish ma’lum vaqtni talab qilardi.
Angliyadagi ikkinchi mavsumni Son o‘rinbosarlar jamoasida boshlaydi. Keyinchalik Pochettino shogirdiga imkoniyat beradi va Son bundan unumli foydalanadi.
Sentabr oxirida “shporlar” ustozi shunday deydi: “Angliyadan bo‘lmagan barcha futbolchilar uchun bu og‘ir. Premyer Liga — jahondagi eng qiyin chempionat va ko‘nikma hosil qilish uchun vaqt kerak. Bir yil va yozdan keyin u boshqa odamga aylandi. Ancha chiniqdi, u ligani yaxshi biladi va uni qoyilmaqom o‘zlashtirdi”.
2017-yilning martida Son londonliklar klubidagi ilk het-trikini nishonladi, mavsumni esa 21 ta gol bilan yakunladi. Koreyalik futbolchi Premyer Ligadagi so‘nggi mavsumida “Tottenhem”ning 27 ta golida (17 ta gol, 10 assist) qatnashdi va bu borada faqat Harri Keyndan (23 gol, 14 assist) ortda qoldi.
Terma jamoadagi faoliyati haqida
Son Hyon Min terma jamoadagi debyutini 2010-yilda Suriyaga qarshi o‘rtoqlik o‘yinida o‘tkazgan. Shundan keyin futbolchi jamoasi bilan Osiyo Kubogi—2011 musobaqasiga yo‘l oladi. O‘shanda Son Hyon Min jamoasi uchinchi o‘rin uchun bahsda O‘zbekistonni mag‘lub etgandi. 2015-yilgi Osiyo Kubogida esa Son chorak finalning qo‘shimcha bo‘limlarida O‘zbekiston darvozasiga ikkita to‘p kiritgandi. Sonning “oq bo‘rilar”ga qarshi so‘nggi o‘yini O‘zbekiston uchun alamli bo‘lgan. 2017-yil “Bunyodkor” stadionida bo‘lib o‘tgan nursiz o‘yindan so‘ng o‘sha vaqtda Samvel Babayan qo‘l ostidagi jamoa JCh—2018 yo‘llanmasidan quruq qolgan.
Son Hyon Min Janubiy Koreyaning 2018-yilgi Osiyo o‘yinlaridagi g‘olibligidan keyin ikki yillik harbiy xizmatdan qutulib qoladi. O‘sha musobaqaning chorak finalida Koreya O‘zbekistonga qarshi o‘ynaydi. O‘zbekistonliklarning ustunligida o‘tgan bahsda Janubiy Koreya qo‘shimcha bo‘limlardagi gol evaziga g‘alaba qozonadi va keyingi bosqichga yo‘l oladi.
O‘sha o‘yindan keyin Son O‘zbekiston olimpiya terma jamoasi avtobusiga chiqadi va raqib futbolchilariga minnatdorchilik bildiradi. “U o‘yindan keyin avtobusimizga chiqdi. U o‘yin uchun minnatdorchilik bildirdi va terma jamoamizga omad tiladi. Son juda xursand edi, chunki bu o‘yinda yutqazsa ikki yillik armiyaga ketishi kerak edi”, — deya eslaydi o‘sha uchrashuvda yorqin o‘yin ko‘rsatgan Ikrom Aliboyev.
Izoh (0)