4-iyul kuni Buxoro viloyati Olot tumani “Usmonshayx” mahallasida yashovchi fuqaro yer talashib, singlisini pichoqlab qo‘ydi, deb xabar beradi viloyat IIB matbuot xizmati.
Ma’lum qilinishicha, 63 yoshli T.H. ismli shaxs 58 yoshli singlisi T.R. bilan yer-joy talashishi oqibatida kelib chiqqan janjal vaqtida singlisining ko‘krak qafasi hamda bel sohasiga oshxona pichog‘i bilan urib, tan jarohati yetkazgan.
Oqibatda T.R. olgan tan jarohatidan voqea joyida vafot etgan.
Mazkur holat yuzasidan Olot tumani prokuraturasi tomonidan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilib, fuqaro T.H. ish bo‘yicha gumon qilinuvchi tariqasida ishtirok etishga jalb qilingan va ehtiyot chorasi sifatida qamoqqa olingan.
Avvalroq Jizzaxda mast erkak ustachilik bilan shug‘ullanib kelgan xonadoshini paqir bilan urib o‘ldirib qo‘ygani, Toshkentda shar’iy nikohdagi xotinini o‘qlov bilan urib o‘ldirgan erga sud hukmi o‘qilgani, Qoraqalpog‘istonda mast holdagi 57 yoshli erkak xotini va 18 yoshli qizini o‘ldirib qo‘ygani to‘g‘risida xabar berilgandi.