Сурхондарё вилояти Шўрчи туманида қарзини сўраб келган сотувчини қарздорнинг ўғли пичоқлаб қўйди. Бу ҳақда вилоят ИИБ ахборот хизмати хабар берди.
Маълум қилинишича, Шўрчи туманида 2021 йилнинг 26 июнь куни соат 20:30 ларда туманнинг «Ойнакўл» маҳалласида яшовчи Ж.А. қўшниси бўлиб яшовчи қариндоши Қ.Р. исмли аёлнинг яшаш уйига келиб, ундан савдо дўконидан олган озиқ-овқат маҳсулотлари учун қарзини сўраган.
Шундан сўнг у аёл билан ўзаро тортишиб, уни ҳақорат қилган. Қ.Р.нинг ўғли Ж.Б. жанжалга аралашиб, унинг онасини ҳақорат қилгани сабабли яшаш уйидан ошхона пичоғини олиб, Ж.А.нинг сон қисмига бир маротаба санчиб, ҳаёт учун хавфли бўлган оғир тан жароҳати етказган.
Оқибатда Ж.А.га тиббий ёрдам кўрсатиш учун туман тиббиёт бирлашмасига олиб борилаётганида, йўлда вафот этган. Ж.Б.га нисбатан Жиноят кодексининг 104-моддаси 3-қисми «д» банди (жабрланувчининг ўлишига сабаб бўлган қасддан баданга оғир шикаст етказиш) билан жиноят иши қўзғатилган.
Бундан аввал Бухорода 63 ёшли эркак ер талашиб, синглисини пичоқлаб қўйгани, Жиззахда хотинини хиёнат қилишда айблаб, уни ўлдириб қўйган шахс 14 йилга қамалгани ҳамда Фарғонада 29 ёшли эркак қўшни келинни пичоқлаб ўлдиргани ҳақида хабар берилди.
Изоҳ (0)