Navoiyda qimmatbaho metallarga ega 5 ta yer uchastkasi sotuvga qo‘yildi

Davlat aktivlarini boshqarish agentligi tomonidan Navoiy viloyati Nurota tumanidagi 5 ta yer uchastkasi sotuvga chiqarildi.

Ma’lum qilinishicha, 3-4,5 gektar orasida bo‘lgan uchastkalarning boshlang‘ich narxi 25,7-38,5 million so‘m atrofida. Yer uchastkasidan foydalanish huquqi 3 yil muddatga beriladi:

• Shoxsoy-5/21 konidagi 4 gektar;
• Shoxsoy-4/21 konidagi 4,5 gektar;
• Shoxsoy-3/21 konidagi 3 gektar;
• Shoxsoy-2/21 konidagi 4 gektar;
• Shoxsoy-1/21 konidagi 4,5 gektar.

Eslatib o‘tamiz, 2019-yilning aprelida O‘zbekistonda onlayn auksionda oltin qazib olish mumkin bo‘lgan dastlabki yerlarga egalik huquqi sotilgandi.Ma’lumot uchun, Vazirlar Mahkamasining 2019-yil 16-martdagi 224-sonli qarori bilan Qimmatbaho metallarni oltin izlovchilar usulida qazib olish faoliyatini amalga oshirish tartibi to‘g‘risidagi nizom tasdiqlangan. Unga ko‘ra, Davlat geologiya va mineral resurslar qo‘mitasi yer qa’ri uchastkalarining ro‘yxati tasdiqlanganidan so‘ng 5 kunda auksionni o‘tkazish uchun ma’lumotlarni tayyorlaydi. Auksion o‘tkazish haqidagi xabar auksiondan 5 kun oldin e’lon qilinishi lozim. Auksionda ishtirok etish uchun arizalar “Elektron onlayn auksionlarni tashkil etish markazi”ning veb-saytida (e-auksion.uz) qabul qilinadi. Arizachi hisob raqamga yer uchastkasining 5 foizi miqdorida zakalat pulini joylashtirishi kerak.