9-iyul kuni “Tolibon” harakati vakillari Turkmaniston bilan chegara hududidagi Afg‘onistonning Turgundi shahrini egallab oldi. Bu haqda “Xronika Turkmenistana” xabar qildi.
Shaharni egallab olish vaqtida ikki tomon, ya’ni Afg‘oniston hukumatiga qarashli qo‘shin hamda “Tolibon” vakillari minomyot va granatomyotlardan foydalangan. Snaryadlarning parchalari Turkmaniston hududiga ham uchib tushgani aytilmoqda.
Xabarlarga ko‘ra, Turkmaniston milliy xavfsizlik vazirligi vakillari Turgundi hududini egallagan “Tolibon” a’zolari bilan muzokaralar olib bormoqda.
Turkmanistonning Serxetabat shahri Afg‘oniston bilan chegaradan 2 kilometr uzoqlikda joylashgan va u yerga Kaaxk, Tejen va Taxtabozor harbiy bo‘linmalarining tarkibi safarbar qilingan, shuningdek, bronetransport hamda artilleriya ham tashlangan.
Ashxoboddagi chegara qo‘shinlari va Milliy xavfsizlik vazirligi qo‘shinlari gospitalida yaralangan harbiylarni qabul qilish uchun joylar tayyorlab qo‘yilgan. Kasalxonalarga snaryadlar parchalarining tushishi oqibatida jarohat olgan turkmanistonliklar murojaat qilmagan.
“Turkmen.news” nashrining qayd etishicha, turkmanistonlik ofitserlar, Serxetabatdagi harbiylar o‘z oila a’zolari va farzandlarini vaziyat tobora keskinlashayotgan hududdan uzoqda yashaydigan qarindoshlarining uylariga ko‘chirib yuborgan.
Avvalroq “Tolibon” vakillarining Moskvaga muzokaralar uchun borgani haqida xabarlar tarqalgan. Uchrashuvda harakat vakillari Rossiyaga Afg‘oniston tomondan chegarani buzib, Markaziy Osiyodagi boshqa mamlakatlar hududiga kirmasliklari haqida va’da bergan.
Turkmaniston prezidenti Gurbanguli Berdimuhamedov 1-iyul kuni Xavfsizlik kengashining kengaytirilgan yig‘ilishini o‘tkazgan, unda Afg‘oniston bilan chegara hududidagi harbiy safarbarlikni kuchaytirilishi qayd etilgan.
Shuningdek, 5-iyul kuni Tojikiston prezidenti Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etgan, 8-iyulda esa Tojikiston Afg‘oniston bilan chegaraga qo‘shimcha qo‘shinlarni yuborishi, chegarani yanada mustahkamlash uchun zaxiradagi yana 20 ming harbiyni safarbar qilishi haqida xabar berilgan.