Бухоро шаҳрида пиёдага йўл бермай, ЙТҲ содир қилиш хавфини туғдирган Damas ҳайдовчиси ушланиб, жаримага тортилди. Бу ҳақда «Дарё»га Вобкент туман ИИБ ЙҲХБ бошлиғи Атоқул Ҳамдамов хабар берди.
Таъкидланишича, 2021 йилнинг 29 июнь куни Бухоро шаҳрининг Ислом Каримов кўчасида ҳаракатланиб келаётган Damas русумли 80 Z 928 JА давлат рақам белгили автомашина ҳайдовчиси пиёдалар йўлакчасида пиёдага йўл бермай, ҳаракатини давом эттирган.
Ижтимоий тармоқларда тарқалган видеолавҳада кўринишича, ҳайдовчининг ёнида бўлган шериги хавфни сезиб, ҳайдовчига тожик тилида «тўхтанг, тўхтанг», деган. Йўл ҳаракати қоидасини бузган Damas ҳайдовчиси эса шошиб қолиб, пиёдани уриб юбормаслик учун автомашинаси билан бетон тўсиққа бориб урилган.
Видео ижтимоий тармоқларда тарқалгач, Бухоро вилоят ИИБ ЙҲХБ ходимлари томонидан суриштирув ҳаракатлари олиб борилган. 2021 йилнинг 10 июль куни Вобкент туман ички ишлар бўлими ЙҲХБ маъмурий амалиёт инспектори, катта сержант Бахтиёр Шодиев Damas ҳайдовчиси шахсига аниқлик киритган.
Қайд этилишича, «Кумушкент» МФЙ Розмоз қишлоғида яшовчи 40 ёшли Э.Ж.га нисбатан Маъмурий жавобгарлик тўғрисидаги кодекснинг 128-моддаси (ҳайдовчиларнинг транспорт воситаларини пиёдалар йўлакларидан юргизиши, йўл белгилари ва йўл ҳаракатининг бошқа қоидалари талабларига риоя этмаслиги) билан маъмурий баённома тузилиб, жарима солинган. Автомобиль эса жарима майдончасига жойлаштирилган.